بتتميز الحيوانات بالوفاء الشديد لأصحابها من البشر ومن ضمنها الإبل. وفي فيديو في السعودية انتشر على مواقع التواصل الاجتماعي كان دليل على إن وفاء الحيوانات وفاء طويل الأمد، وفاء مش مرتبط إذا كان الشخص ده لسه مسئول عنه ولا لأ. الفيديو وثق لحظة لقاء بين ناقة وصاحبها اللي ماشفهاش من فترة طويلة وهي بتحضنه وبتلف رقبتها حوليه ومش عايزة تسيبه في مشهد عبر عن مشاعر حب ووفاء مش موجودة عند بشر!
الإبل لها أهمية كبيرة في كتير من الدول العربية، وبتعرف الجِمال باسم “سفن الصحراء”، وكانت بتستخدم زمان للتنقل في رمال شبه الجزيرة العربية لحد ما بقت رمز تقليدي. ولحد دلوقتي هي جزء من حياة المجتمع في الخليج.
قصص الوفاء بين الحيوانات والإنسان مش غريبة، ومش أول مرة نسمع عنها. سجلت على مر العصور حكايات إخلاص عظيمة. وكانت من القصص المؤثرة الأخيرة اللي سمعنا عنها. قصة كلب انتشر له صورة وهو واقف حزين على جسر في الصين لمدة أربع أيام بعد انتحار صاحبه. وفضل واقف في نفس المكان اللي انتحر فيه على أمل إن صاحبه يرجع تاني، وفي قصة تانية في وقت كورونا كلب استنى صاحبه اللي مات في العزل لمدة 3 شهور، وقصة لقطة كانت بتسمع صوت طفل رضيع داخل كرتونة في الشارع في الشتا. فضلت القطة تتحرك عليه وتدفيه بفروها وتصيح بصوت عالي لحد ما الناس في الشارع اتجمعت عليه وأنقذوه.