مقال رأي
بتغير الزمن والتطور اللي شمل كل حاجة حوالينا وكل متطلبات حياتنا، اتغيرت الوظائف كمان وظهرت وظائف كتير ومبقاش الموضوع زي زمان مقتصر على شغلانات معروفة، مابقتش دكتور ومهندس وعامل ومزارع، ظهرت شغلانات كتير جدًا بمواكبة لمتطلبات العصر زي ما بيقولوا، لكن مؤخرًا ظهر بعض الناس تحت مسمى شغلانة “بلوجر” أو مؤثر، لكنهم بيستغلوا المهنة لمجرد إن عندهم عدد من المتابعين، ويطلقوا على نفسهم لقب البلوجر تحت أي مصنف، آخرهم في الموضة دي كانوا “الفود بلوجرز” أو ناقدي الطعام.
ناقد الطعام مهنة نعرفها، بيكون ممتهنها شخص دارس وممكن يبقى أصلًا شيف، عارف الشغلانة وشارب أصولها من بلاد مختلفة، ومطابخ مختلفة حول العالم، عنده خبرة ويقدر يقول الطبق معمول على وصفته الأصلية ولا فيه إبداع مقبول فيها، وبينتقد بطريقة مهنية، وشوفنا ناقدي طعام اتشهروا سواء ببرامج على التلفزيون أو موجودين على السوشيال ميديا، زي مراد مكرم، عمرو حلمي، وغيرهم.
لكن الجديد مؤخرًا إننا بقينا نشوف كمية فيديوهات لناس بيطلقوا على نفسهم “فود بلوجرز” بيقيموا في أكل مطاعم مختلفة، في الغالب بنحس من الفيديوهات إنها إعلانات ممولة بطريقة كلها حشو، هما فاكرين إنها كده إعلان غير مباشر، لك احنا عارفين وانتوا عارفين إنه مجرد إعلان وأنت واخد فلوس مقابل الخدمة دي، وبنسمع كمان عن البعض بيتبع أسلوب مبتذل، وهي ابتزاز أصحاب المطاعم ومحلات الأكل بنقد الطعام، بمعنى “هتأكلني ببلاش ولا أنزل ريفيو وحش عن مطعمك؟” فبيبقى الشخص اللي أطلق على نفسه فود بلوجر مستني ياكل ببلاش من المحلات لمجرد امتهانه المهنة دي.
الأسلوب ده تحت بند “شغلانة اللي مالوش شغلانة” شوفناه في حاجات كتير خصوصًا على السوشيال ميديا، غير ناقدي الطعام، شوفناها كمان في ناس كتير ماتعرفش دارسين إيه ولا إيه مؤهلاتهم اللي تخليهم يطلعوا يدوا نصايح للناس ويحسسوهم إن حياتهم كلها غلط، حتى الطريقة اللي بيتنفسوا بيها، و”ازاي وصلت لسن التلاتين من غير ما تعمل أول مليار دولار” وحاجات من هذا القبيل، تحت مسمى “اللايف كوتش”.. أنت مين ومين ادالك الحق تقولي أعيش حياتي ازاي؟ ولو مش عايشها على طريقتك يبقى أنا دافن نفسي بالحيا؟
الحقيقة ده مش رأينا بس، لكننا بنشوف ناس كتير على السوشيال ميديا متبنيين نفس وجهة النظر، هل كلنا فاشلين وكلامك جه على الجرح فبنهاجمك؟
وطبعًا -قبل ما تقرأ المقال وتهاجمنا وخلاص- كلامنا مش موجه لأصحاب المهن دي، لأننا عارفين إنها مهن مهمة ولها أخلاقياتها وأهدافها، وكلامنا مع أصحاب المهن دي مش ضدهم، لكنه ضدد اللي بيسيء لها ويسيء استخدامها وحتى يخلي الجمهور ينفر منها.
وكمان كلامنا مش موجه لناس بتحب تجرب الأكل مثلًا وتشارك ده مع أصحابها أو متابعينها، أو الناس اللي مرت بتجارب في حياتها وحبت تشاركها علشان ماحدش يقع في نفس الغلط مثلًا، لكن كلامنا واضح بينتقد مين، الناس اللي واخدة ده كشغلانة وبتدي لنفسها الحق في إنها تقرر لغيرها إيه الحلو وإيه الوحش ونعمل إيه ومانعملش إيه.