جدل كبير حصل على الساحة بعد عرض برومو مسلسل خليجي اسمه “من شارع الهرم إلى..” وطالبوا بوقف عرض المسلسل ده لإنه بيٌسيء لسمعة مصر وفيه إهانة للمرأة المصرية.. طب ردود الأفعال كانت عاملة ازاي؟
ردود أفعال المصريين والعرب بعد عرض البرومو
اللقطة اللي ظهرت في البرومو كان فيها راقصة مصرية بتتعمد إنها تغوي راجل خليجي وتضحك عليه، وده غير إن اسم المسلسل أصلًا “شارع الهرم” واللي يُعتبر واحد من الشوارع المصرية المشهورة بالملاهي الليلية.
الناس كانت بتقول ليه المسلسل حصر المرأة المصرية في دور الراقصة بس؟ ما احنا عندنا نماذج كتير ناجحة وتشرف زيّ هداية ملاك وهنا جودة ونفين درويش ونور الشربيني، والست المصرية هي أول ست تحكم العالم وستات كتير أثبتوا نفسهم في الفترة الأخيرة يستحقوا الكلام عنهم، ليه حصروا الستات المصرية والبنات واختذلوها في صورة راقصة بتجري ورا الفلوس؟
وليه اسم المسلسل شارع الهرم؟ ليه ماتكلموش عن شوارع تانية في مصر تاريخية، زيّ شارع المعز وخان الخليلي والأزهر والغورية؟ ما دول كمان بيعبروا عن مصر وبيرمزوا لمصر وتاريخها، ليه بالتحديد اختاروا شارع الهرم علشان يبقى الاسم اللي يتباع به المسلسل؟
واحد من المُغردين العرب علق على الموضوع وقال إن المصريين لو عايزين يتكلموا عن أي عيوب عندهم ويظهروا ده، دي حاجة تخصهم، بس احنا لما نيجي نتكلم عنهم نتلزم الأدب والاحترام.
كما تَدِينُ تُدَان؟
على الجانب التاني بقى، معروف إن السينما المصرية والدراما في الأغلب لما بتيجي تتكلم عن الخلايجة برضه بتحاول تعمل تنميط، بتظهرهم بيحبوا الفلوس والستات، ومش بييجوا لمصر غير علشان يدخلوا الكباريهات ويزغللوا الستات بالفلوس. حتى في تنميط من ناحية اللبس، زيّ إن لازم يبقى لابس الجلابية على طول وبيقول نكت سخيفة مايتضحكش عليها.
قصة متعادة ومتكررة في أي فيلم، لما يحبوا يغصبوا بنت على الجواز يجوزوها واحد جاي من الخليج وجاهز ومعاه فلوس، ويبعتوها له بفستان الفرح على الطيارة بدل حبيبها الكحيان اللي ماعهوش يفتح بيت.
في نفس الوقت اللي العرب بيشتكوا فيه من الصورة النمطية اللي متاخدة عنهم في الغرب؛ إن العرب إرهابيين ومُتخلفين ورجعيين، احنا هنا في السينما والدراما العربية بنعمل نفس الحاجة وبنمارس نفس التنميط على بعض، مصر يعني شارع الهرم والأجواء الليلية والسهر، والخلايجة يعني شوال فلوس وزير نساء جاي علشان يضحك على بناتنا ويشتريهم بالفلوس.. طب لحد امتى؟
الشعوب العربية مايعرفوش حاجة عن بعض ولا عن عاداتهم وتقاليدهم، وكل الصور اللي بيكونوها عن بعض بتبقى متاخدة من الأفلام والمسلسلات، طب ليه احنا مانعملش مجهود أكتر لما السياق الدرامي يتطلب إننا نتكلم عن دولة تانية، أو مثلًا البطل هيسافر لدولة تانية؟ ونبتدي نستغل ده ونحاول نظهر الحاجات اللي العرب اللي مايعرفوهاش عن بعض، حاجات تقربنا لبعض وتخلي في تفاهم وود وحب أكتر، ولما نيجي نقدم العيوب والمشاكل، كل دولة تتكفل إنها تتكلم عن اللي يخصها، إيه اللي هيحصل لو عملنا كده؟