الشتاء بيحب الأكل دي قاعدة معروفة، بنحب نقضي وقتنا في الشتا واحنا متدفيين وبنتفرج على أفلامنا ومسلسلاتنا كده، ونعمل جو لذيذ نتسلى بيه علشان الخروج والفسح مش بيبقوا كتير في الجو البرد، ومعظم الناس بتحب تقضي الشتا في الأنتخة والأجواء الهادية دي، وعلشان نتدفى ونتسلى، بيبقى أبطال القعدة مشروبات شتوية بنحبها، وحلويات تدفينا، هنشوف إيه هي الحلويات المفضل لينا في الشتاء.
البطاطا
بطلة الشتا بلا منافس، الجو بتاعها اللي مشهورة فيه وتقريبًا مش بناكلها غير في الفصل ده وهي لايقة على الجو البارد، بوصفاتها اللي مابتخلصش، البطاطا الحلوة تعتبر من أشهر الحلويات اللي الناس بتفضلها في الشتا، سواء بناكلها مشوية من الشارع أو في البيت، أو في صينية مع جوز الهند والقرفة، أو أيًا كانت طريقتك المفضلة في أكلها، لكن أكيد مش هتستغنى عنها في الشتا.
قرع العسل
سواء في صينية أو طاجن بالبشاميل وجوز الهند، أو ندخله في الكيكة، قرع العسل من أشهر الحاجات اللي الناس بتحبها في الشتا وسهل ندخله في وصفات كتير، ناس كمان بتحب تعمله في المهلبية، سمعنا عن طرق كتير نقدر ندخل فيها قرع العسل ويبقى حلو.
أم علي
بالمكسرات، وبالوش بتاعها وهي لسه طالعة من الفرن، ولو بتحبها كمان بالزبدة والقشطة، أم علي من أحلى الحاجات اللي الناس بتحب تاكلها في الشتا وبتدفينا، وكمان طعمها مالوش منافس.
كيكة الشوكولاتة
خصوصًا من بعد الحجر الصحي في وقت انتشار فيروس كورونا، اتعودنا إنها خلاص شريك أساسي في قعدة البيت في الشتا، لدرجة إن طلع عليها ميمز واتعرفت بـ “كيكة الحظر”، الكيكة عمومًا من أسهل الحاجات اللي بتتعمل في قعدة الشتا، ومعظم الناس بتحبها بالشوكولاتة، فبقت من الأساسيات لحلويات الشتا.
باستا فلورا
يمكن مش ناس كتير تعرفها، مع إنها من أسهل وأسرع وصفات الحلويات، وكمان طعمها مميز، وفي الشتا بتكون اختيار مثالي لقعدة حلوة ودفا في البيت، وصفتها سهلة وسريعة وبيدخل فيها المربى، وممكن تختار النوع المفضل ليك في المربى علشان تحصل على نتيجة تحبها.
شعرية باللبن
من صنف للأكلات والأطباق الرئيسية، لـ plot twist تخليها من الحلويات المشهورة للتدفئة في الشتا، الشعرية باللبن حاجة سهلة وسريعة لكنها المفضلة لناس كتير خصوصًا في الشتا، بالزبدة والسكر واللبن، هنقدر نحول الشعرية لطبق حلو مميز في البرد.
في الآخر بننصحك ماتزودش في الحلويات، الدفا حلو آه، بس ماحدش هينفعنا لما نوصل الصيف نلاقي وزننا ضعفين، ده غير إن أي حاجة بتيد عن حدها بتبقى مضرة، فماتعرض نفسك للخطر بزيادة السكريات، وكُل بكميات معقولة.