بالنسبة لكتير من سكان العالم العربي، البيت هو مساحة آمنة نقدر نكون على طبيعتنا فيها. البيوت بالنسبة لينا هي مكان حب وتفهُم، بس للأسف بيوت كتيرة في مجتمعاتنا الذكورية هي سجون للمرأة وللأطفال وبؤر للعنف الأسري، مش بس في الشرق الأوسط بس في العالم كله، ومع تطبيق حظر التجوال على معظم سكان العالم، منظمات حقوق المرأة بدأت تصدر تقارير مقلقة عن زيادة نسبة العنف الأسري في بيوتنا. لستات كتير البيت مش مساحة أمنة، بالعكس البيت مكان مليان تعسف وأذى وفيه حياتها معرضة للخطر.
في لبنان، على سبيل المثال، “مرصد أبعاد لدراسات المساواة بين الجنسين” كشف عن زيادة غير مسبوقة في عدد المكالمات الواردة على خط الساخن للتبليغ عن العنف الجنسي في البلد. للأسف نسبة 60% من الحالات اللي بتتصل هي حالات جديدة مبلغتش عن عنف جنسي قبل كدا. كل يوم العاملين بالمركز بيكون عندهم حالتين أو 3 حالات جديدة لستات مش عايزين يقعدوا في بيوتهم بسبب العنف اللي بيتعرضوا له من أفراد أسرتهم، وما زاد الطين بلة إن معظم الملاجئ في لبنان قفلت باب دخول الحالات الجديدة بسبب خوف من نشر عدوى “كوفيد-19”.
في الأردن من عشر أيام، فيديو لزوجة عندها 36 سنة قلب البلد كلها. إيمان الخظيب في فيديو على السوشيال ميديا استنجدت بمنظمات حقوق المرأة في الأردن وبلغت عن إزاي بتتعرض للعنف كل يوم هي وإبنها، وشرحت إزاي إن بسبب وباء فيروس الكورونا هي فقدت وظيفتها ومكنتش قادرة تلاقي وظيفة جديدة، وبسبب تأجيل المدارس هي وإبنها بقوا بيقضوا وقت أكتر في البيت وده أدى لعنف أكتر اتعرضوا له. بعد غضب على الانترنت من الحادثة وتعاطف الأردن بأكملها مع إيمان، إتحاد نساء الأردن قدر يوفرلها هي وإبنها بيت جديد بعيد عن العنف اللي كانت بتتعرضله.
بقطاع غزة، ألاء أكنِس عاملة بعيادة طوارئ مختص بعلاج ضحايا العنف الأسري بتنصح أي واحدة بتتعرض لعنف إنها تسيب البيت ويكون معاها ورق هوية رسمي وتليفون عليه أرقام منظمات ومعارف محل ثقة ويقدروا يساعدوا وقت الأزمة.
الظاهرة دي للأسف مش في العالم العربي بس، ستات كتير حوالين العالم بيبلغوا عن زيادة في العنف ضدهم، معظمهم ضحايا لأول مرة. الأمين العام للأمم المتحدة انطونيو جوتريش طلع في بيان ودعا العالم كله لإنه يخليّ سلامة النساء في البيوت أولوية في خلال الفترة الصعبة اللي إحنا بنمر بيها دي.