مشهد البارات في وسط البلد: كل ما تحتاج معرفته

     هما تقريبًا الأقدم في مصر، أحيانًا بيُطلق عليهم “البارات البلدي”، بارات وأماكن الشرب في وسط البلد هما أساس حياة ما بعد منتصف الليل في قلب العاصمة المصرية. فعلى عكس الأماكن الشهيرة في الزمالك والمعادي والتجمع الخامس، الحانات دي هي جواهر مستخبية بتقدم أنواع جيدة جدًا من الشراب وجو هادي وجميل.

وانت بتتمشى في حي وسط البلد، بيكون من الصعب إنك تعثر على إحدى هذه البارات بسبب اختبائهم لعصور طويلة داخل الأزقة والممرات الضيقة، كل اللي محتاجه بس هو إنك تبقى عارف تدوّر فين. فيه اختيارات كتير هتكون قُدّامك، فاستعد لتجربة فريدة من نوعها داخل جنبات وجدران وتراث الحي العتيق.

ودي قائمة كاملة بأهم البارات المتواجدة في مدينة القاهرة:

ستيلا بار     

واقع في تقاطع شارعي هدى شعراوي وطلعت حرب، بجانب وجهة الفطور الشهيرة مطعم فلفلة، ستيلا بار كان ومازال واحد من أشهر وأفضل بارات وسط البلد على مر العصور. هو مكان تجمع المفكرين والفنانين والمغتربين وأهل البلد وجميع فئات السكان المختلفة.

المشروب الأشهر هناك هو بطبيعة الحال بيرة ستيلا، وهو مشروب الشعير المصري اللي بيرجع تاريخه لأكتر من قرن من الزمان. بس كمان فيه مشروبات تانية هناك، وكله بيتراوح سعره ما بين رخيصة ومعقولة إلى حد كبير. زبائن المكان بيتميزوا بالتنوع الشديد في كل حاجة تقريبًا، السن والاهتمامات والاتجاهات وغيرهم، فاستعد لليلة شيقة من المشروبات الممتعة والأجواء المختلفة والمحادثات المثيرة.

الحرية

بالظبط وانت خارج من شارع باب اللوق قرب مسرح الجامعة الأمريكية أو كما يُعرف ب”الجريك كامبُس” وفي منتصف صخب وسط البلد بيقع بار وكافيه الحرية. تقدر تقول كده إنها مش حانة بالمعنى التقليدي، بل قهوة بلدي بس الفرق إنها بتقدم بيرة، ودا الحاجة الوحيدة المتاحة هناك اللي بتفرق ما بينه وبين القهوة التقليدية.

المكان مغطى بحوائط زجاجية وسقفه عالي جدًا مع استخدام أنوار النيون اللي بتخلي المكان شكله مميز جدًا حتى إنه تقريبًا الأخير من نوعه في مصر. المكان مشهور في أوساط الطلبة والسائحين وأهل المنطقة على السواء. البار محافظ على نفس مكانه ورونقه وشهرته من سنين طويلة جدًا والسبب في دا هو بالتأكيد أسعاره اللي بتخليه أرخص مكان بيقدّم بيرة في مصر.

شهرزاد

قصر شهرزاد هو بار أو بالأحرى كباريه وملهى ليلي بشارع الألفي في وسط البلد وعمره أكتر من 50 سنة. من الداخل، الكباريه الصاخب بيتكون من حوائط مغطّاة بصور لبعض الراقصات، وصور من قصة ألف ليلة وليلة والأمراء العرب على أحصنتهم، مع أنوار الكريسماس اللي نازلة من السقف. الديكور بأكمله صاخب للغاية ورديء بعض الشيء، بس لما تحطه كله على بعض، بطريقةٍ ما بتحس إنه كله بيكون صورة متكاملة.

اللي بيميز المكان هناك هو الراقصة الشرقية التقليدية، وعادةً ما بيكون فيه فرقة بتغني أغاني شعبية صاخبة، وترابيزات مغطاة بغطاء قماشي وبيرة الستيلا الشهيرة، من الآخر هتلاقي هناك كل اللي ممكن تتوقعه في كباريه مصري أصيل. المكان هناك بيقدّم بيرة ونبيذ وأنواع كتير مختلفة من الخمور، والبيرة هناك بتُقدَّم بداخل إناء من الثلج.

اللي شغالين في المكان هناك هيحكولك حكايات عن إزاي رقاصات زي فيفي عبده بدأوا مسيريتهم من على منصة شهرزاد وقد ايه المكان كان بيمثل الحياة الليلية في القاهرة والشرق الأوسط في العصور القديمة. هي على بعضها تجربة لطيفة تستحق الليلة اللي هتقضيها هناك.

سطح فندق هابي سيتي

هابي سيتي هو فندق ثلاث نجوم بوسط البلد بيقع في شارع محمد فريد وبالقرب من محطة مترو محمد نجيب، المكان هناك متواضع إلى حدٍ ما لكن اللي بيخليه مميز ومشهور هو البار على الروف الخاص بيهم واللي بيوفّرلك مشهد رائع لحي وسط البلد بالكامل من الأعلى، والميزة الأكبر كمان إنه فاتح 24 ساعة طول أيام الأسبوع. المكان بيقدِّم بيرة بأسعار متوسطة وكمان مَزّات شهية. فلو انت عايز تستمتع بليلة هادئة مع زجاجة ستيلا ومشهد باريسي على ضفاف النيل، فالمكان دا هو وجهتك المثالية.

المورياز

الاسم مستوحى من اسم مالك البار الأصلي وهو السيد الفرنسي موريس، وهو بيُعتبر واحد من أقدم بارات وسط البلد الواقع في شارع عدلي العتيق منذ عقود مضت. البار واحد من أوضح الأماكن الليلية في وسط البلد بألوانه الحمراء الفاقعة والخارجة من المكان وعلامة الستيلا اللي موجودة على المدخل. أول ما تدخل، هتلاقي المكان متقسم جزئين؛ نص عنده رسمة كبيرة باللون الأحمر، والتاني رسمة كبيرة باللون الذهبي. وكمان هتلاقي في نص منهم بوستر كبير لإزازة ستيلا، والنص التاني هتلاقي مراية ضخمة.

المكان بشكلٍ عام لطيف تقدر تستمتع فيه بوقتك وتتعرف على ناس تانيين وتشاركهم أحاديثهم من غير ما حد يشعر بأي غرابة في الموضوع. وبالرغم من إن الزبائن هناك أغلبهم من جنس الرجال إلا إن السيدات مش بيواجهوا أي مشاكل في التردد على المكان من حين لآخر.

نيو أريزونا

واحد من أصغر بارات وسط البلد لكنه غني جدًا بتاريخه، ومكانه هو الناحية التانية من كباريه شهرزاد. من الداخل، المكان مليء بالرسومات القديمة والصور اللي متعلقة جنب ديكور ستيلا المعتاد. من وقت لآخر، توقع قطة المكان المسالمة جدًا تيجي تقعد على رجلك شوية وبعدها تزهق وتقوم تشوف مكان تاني.

تمامًا زي شهرزاد، هتلاقي أنوار الكريسماس متعلقة بالداخل ونازلة من السقف مع تليفزيون قديم جدًا على الجانب الأيسر من الحجرة. هو واحد من أكثر بارات وسط البلد هدوءًا وراحة، فلو انت مش من أكبر المعجبين بالأنوار الكتير العالية والموسيقى الصاخبة بس عايز تستمتع بمكان تشرب فيه كاسين في هدوء وارتياح فالمكان دا هيكون الأنسب.

بالميرا

بروسوماتهم الزيتية الجدارية الشهيرة اللي موجودة خلف المسرح هناك واللي هتلاقي فيها تصوير أنيق  للفراعنة وهما نصف عراة، هتعرف فور دخولك المكان إنك على وشك بدء رحلة غريبة الأطوار. الكباريه الشهير بيتمتع بسُمعة اكتسبها على مدار سنين وهي إن أفضل الراقصات بحي وسط البلد موجودين هناك. ملهى بالميرا هتلاقيه بداخل ممر سكارابيه العتيق الخارج من شارع 26 يوليو في قلب العاصمة.

ميامي

واحد من أقدم كباريهات مصر كلها وتقدر تقول بثقة إنه نجح في اختبار الزمن. مسرح ميامي كان شاهد على روايات وفصول كثيرة في قصة ال100 سنة الأخيرة من عمر المحروسة؛ من أول ملكة الرقص الشرقي سامية جمال اللي كانت بتقدم عروضها جنبًا إلى جنب مع الراقصة والفنانة الشهيرة تحية كاريوكا، ولحد الأسطورة المصرية-السورية فريد الأطرش اللي كان بيقدم عروض غنائية على نفس المسرح العتيق.

ولكن المُحزن في الأمر إن المكان حاليًا أسعاره غالية بشكل مبالغ فيه والخدمة مش أحسن حاجة.

آخر كلمة: قولّنا أماكن تانية للسهر في وسط البلد.