الوقوف على خشبة المسرح محتاج لموهبة استثنائية وكاريزما من نوع خاص، وقدرة عالية على جذب الجمهور، وكل ده بيمتلكه النجم يحيى الفخراني، وبسببه بقى من أهم نجوم المسرح في مصر، وعنده تاريخ كبير من المسرحيات الناجحة واللي عملت صدى كبير. ومن جديد هنشوفه تاني في مسرحية “ياما في الجراب يا حاوي”.
المسرحية من تأليف بيرم التونسي ومن إخراج مجدي الهواري، وهيشارك الفخراني في البطولة، إياد نصار ومحمد الشرنوبي وكارمن سليمان، ومفاجأة العرض النجم شريف الدسوقي “سبعبع” اللي هيشارك بدور رئيسي وبترشيح وحماس كبير من النجم يحيى الفخراني.
المسرحية من أجواء ألف ليلة وليلة، بيغلب عليها الطابع الكوميدي الغنائي، وبتضم معاها كل عناصر الدراما من تشويق وصراع إنساني. أول عرض ليها يوم “17 أغسطس” على المسرح الكبير لمكتبة الإسكندرية، وهيكمل لمدة 6 أيام، وتعتبر أول مسرحية جماهيرية هيتم افتتاحها في الإسكندرية من فترة كبيرة، وبعد انتهاء العرض هناك، هتبدأ من تاني على مسرح كايرو شو في التجمع الخامس.
“الملك لير” آخر مسرحيات الفخراني
واحدة من روائع شكسبير، مسرحية “الملك لير” واللي أظهر فيها الفخراني براعة وقدرة في التمثيل عالية، المسرحية بتتكلم عن أب قرر يوزع أملاكه على بناته ماعدا بنته الصغيرة علشان ماعرفتش تنافقه. اتعرضت لأول مرة سنة 2001 واتعاد عرضها تاني سنة 2019 ولإنها حققت نجاح جماهيري كبير، فتم اختيارها علشان تشارك في فعاليات موسم الرياض.
المسرحية كانت من بطولة عدد كبير من النجوم منهم: أشرف عبد الغفور وأحمد سلامة وريهام عبد الغفور ورانيا فريد شوقي وهبة مجدي والنجم فاروق الفيشاوي.