انتشرت على مواقع التواصل الاجتماعي، صورة لمدخل قرية صغيرة متعلق عليه “يافطة” أو “لافتة” مكتوب عليها “ممنوع دخول المتسولين.. سيتم تسليم أي متسول للشرطة” إيه الحكاية؟ وإيه اللي خلى القرية تلجأ للخطوة دي؟
الموضوع بدأ من شهر رمضان، وقت لما لاحظوا أهل القرية إن في ناس كتير غريبة بتتردد على القرية، واللي زود قلقهم أكتر إنهم مش كاشفين وشهم، ولما الموضوع اتكرر كتير، مسكوا حد منهم في يوم وكشفوا وشه، ولقوا إنه شاب صغير مايبانش عليه إنه محتاج فلوس أصلًا! وده يمكن اللي زود شكوكهم.
والسبب الفعلي اللي خلى أهالي القرية ياخدوا الإجراءات إنهم يمنعوا بشكل نهائي أي حد يدخل القرية، هي أخر حادثة حصلت عندهم وقت ما اختفت طفلة من أهل القرية لساعات قليلة، وبعدها شافوا حد من المتسولين واخدها ومشي بيها!
ومن بعدها الأهالي قررت إنهم لازم يلاقوا حل للظاهرة دي، فعملوا “جروب” على الفيس بوك علشان يتواصلوا عليه، فيه حوالي 12 ألف مشترك من أهل القرية، كل واحد كان بيقدم حل في متناول إنهم يقدروا ينفذوه من غير اللجوء للشرطة، واستقروا في النهاية على إنهم يعلقوا على مدخل القرية “لافتة”، ومن وقتها الأهالي قالت إنهم ماشافوش أي متسول تاني بعد تعليقها.
اللي عملته القرية في بداية الموضوع ولما تشاركوا علشان يعملوا اللافتة دي، في الحقيقة مثال نفتخر بيه لإن لسه في ناس بسيطة عندها روح التعاون، وعندهم الوعي الكافي إن الفلوس اللي بتديها للمتسول المفروض تروح للناس اللي تستحقها، سواء في الزكاة أو الصدقة أو إننا نديها لحد فعلًا يستحقها.
بعد الظاهرة دي، شوفنا قرى كتيرة بعدها كررت اللي عملته في محاولة منهم إنهم يقضوا على ظاهرة التسول والمتسولين.