وزارة الحج السعودية أعلنت عن البدء في استقبال كل المعتمرين من المواطنين المقيمين في المملكة، بالإضافة لاستقبال الطلبات من كل دول العالم بشكل تدريجي، وده بداية من النهارده الاتنين الموافق 9 أغسطس، علشان يقدروا يؤدوا مناسك العمرة والصلاة في المسجد الحرام والمسجد النبوي الشريف.
وده هيكون بطاقة استعابية توصل لـ 60 ألف معتمر متوزعين على 8 فترات علشان توصل القدرة الاستعابية في الأخر لـ 2 مليون معتمر، وبالنسبة للتصاريح هتتم من خلال تطبيق “اعتمرنا وتوكلنا” وسط منظومة صحية كاملة من الخدمات والتطبيقات، واللي أخدتها المملكة لضمان سلامة كل المعتمرين.
وبالنسبة لمعايير خدمات النقل الآمن، قالوا إن الركاب في أي حافلة مش هيتجاوز نسبتهم 50% من الطاقة الاستيعابية، وده مع تطبيق التباعد الاجتماعي، وهيتم التأكد من التصاريح اللي طلعت من خلال التطبيق المخصص للعمرةـ أما بالنسبة للتحصين هيكون شرط أساسي لأداء المناسك، وده اللي بيظهره تطبيق “توكلنا” لفئات التحصين التلاتة (محصن أخد جرعتين، أو محصن عدى 14 يوم على تلقيه الجرعة، أو محصن متعافي من الإصابة) وده بالنسبة للناس اللي داخل المملكة. أما بخصوص أي معتمر من دولة تانية، شرط أساسي إنه يجيب شهادة تحصين من الجهة الرسمية للبلد اللي بينتمي ليها.
ودي تعتبر أول مرة من وقت الجائحة تسمح السعودية للمقيمين في الخارج بأداء أي مناسك داخل المملكة، لإن في الفترة اللي فاتت، من وقت الجائحة وهي بتتخذ إجراءات صارمة علشان تقلل الموضوع على قد ما تقدر، وبالفعل نجحت في ده السنة اللي فاتت لما قصرت الحج على 10 آلاف حاج وكانت مقللة الفئة العمرية من 20-50 سنة، وده كان بعد ما كان إجباري إنهم يعملوا اختبار الـ PCR، وبعدها كانت أعلنت برضه قصر الحج في أول السنة دي على المقيمين في السعودية بإجمالي عدد 60 ألف حاج فقط.