انتشرت الفترة الأخيرة في خلال الحظر ودلوقتي في الصيف الالعاب المصرية المختلفة اللي استبدلت الألعاب المستوردة لسبب إنها قريبة أكتر للشعب المصري وبتضمن أفلامهم واغانيهم المفضلة وكمان بتتلعب بالعربي.
وبدأ يظهر على إنستجرام صفحات للغب دي وقوانين لعبها وإزاي تقدروا تشتروها، ومن الألعاب دي:
أوكازيون
اللعبة سعرها ٢٠٠جـ، وبتتكون من ٤ ألعاب.
- “حرامي افيهات”: كل لاعب بيسحب كارتين في كل دور، كارت فية لكنة/ شخصية من فيلم وكارت فيه افيه. كل لاعب لازم يمثل المشهد بطريقة الشخصية أو باللكنة اللي طلعتله في الكارت.
- “الستوديو”: اللاعبين بيسحبوا كارت فيه مشهد من فيلم ولازم يجاوب على أسئلة عن المشهد أو الفيلم
- “أنا عايز جملة مفيدة”: اللاعبين بياخدوا كارت عليه كلام من أغاني عربي وانجليزي، وبيكون الكلام مكتوب صح أو متشقلب. اللاعبين لازم يعرفوا اسم الأغنية.
- “الحكم بالإعدام”: كل لاعب بيسحب كارت جواه سؤال، والإجابة لازم تكون اسم حد من الناس اللي بيلعبوا. لو اللاعب مش عايز يجاوب، لازم ينفذ الحكم.
كرنڤال ٢٠٢٠
سعر اللعبة ٣٠٠جـ، وبتتكون من ٤ ألعاب.
- “قفشات”: اللاعبين بيحاولوا يعرفوا القفشة اللي في الكارت من فيلم إيه.
- “هبسطتهالك”: كل فريق ليه ٩٠ ثانية يخمن حاجتين من ضمن ٣ حجات مكتوبين على الكارت، وبيكونوا فيلم أو ممثل أو مثل مشهور.
- “كلام كبير”: كل لاعب بيسحب كارت وبيجاوب السؤال المكتوب فيه بكل صراحة.
- “مؤسسة”: لاعب واحد بيسحب كارت مكتوب عليه كلمة، وبيقولها لكل اللي قاعدين ما عدا واحد بيقول له إنه “الجاسوس”، واللاعبين بيحاولوا يعرفوا مين الجاسوس عن طريق إنهم يسألوا بعض أسئلة عن الشئ اللي مكتوب في الكارت.
قول أميم
سعر لعبة قول أميم ٢٠٠جـ، وببتلعب بأربع طرق.
- “caption master”: من ٣-٨ لاعبين، كل واحد بياخد ٨ ورقات مواقف وكل دور بيسحب ورقة واحدة جديدة. كل دور بيكون في حكم هو اللي بيحط الميم على الأرض وبيجمع من كل لاعب ورقة موقف. والحكم بيقرا كل الكروت ويقرر إيه أكتر واحدة بتضحك واللي بيكسب بيحتفظ بكارت الميم كنقطة.
- “meme master”: ممكن تتلعب بنفس طريقة “caption master” بس الكروت بتتعكس، كارت الموقف هو اللي بينزل على الأرض واللاعبين يكون معاهم كروت الميمز.
- “speed mode”: وهنا اللاعبين بيلعبوا بكروت الميمز بس، وبيتقسموا لفريقين كل فريق بياخد ٥٠ كارت. والفريقين بيردوا على بعض بكروت الميمز بسرعة ولو في فريق اتأخر في أنه ينزل الكارت ممكن الفريق التاني يرد على نفسه بكارت واللي بيخلص الكروت الاول بيكسب.
- “charades”: ودي بتكون زي لعبة افلام بأستخدام كروت الميمز. واحد بيطلع يشرح الميم منغير مايقول ولا كلمة من الميم.
كازينو ألعاب
اللعبة سعرها ٢٥٠جـ، وبتتلعب بثلاث طرق
- “أسرة مع بعضينا”: كل اللاعيبة هيعملوا جروب على الواتساب اسمة “كازينو” عشان الاجابات كلها هتبقي عليه. كل مرة حد هايسحب كارت والدور هيلف على الكل، وكل كارت هيبقي سؤال مختلف والمطلوب من كل اللاعيبة يجاوبوا والاجابات كلها تبقي على الجروب.
- “ورا الكواليس”: عدد الفرق ٢ أو أكتر، وبتتلعب على ٣ مراحل كل دور ٦٠ ثانية. كل مرة لاعب يسحب كارت ويحاول يخلي الفريق بتاعه يجاوب كل المراحل صح. المرحلة الأولي “المشهد من فيلم إيه”؟ مسموح تحرك شفايفك بالإيفيه المكتوب تقول اللوكيشن اللي الممثل فيه أو كان لابس ايه. المرحلة التانية “اسم الشخصية؟” وده سؤال عن اسماء شخصيات الممثلين في افلام ومسرحيات مشهورة. والمرحلة التالتة “اختيارات” فيها أسئلة اختيارات عن أفلام وإيفيهات.
“مش بالساهل”: عدد الفرق ٢ أو أكتر وعدد اللعبة ٣ مراحل ومدتها ٦٠ ثانية. كل مرة لاعب من كل تيم هيسحب كارت ويحاول يخلي التيم بتاعه يجاوب صح. في المرحلة الأولي، اللاعب بيقول حروف الكلمة بالعكس والتيم بتاعه بيحاول يجمع الحروف. في المرحلة التانية، اللاعب بيوصف الشغلانة /الأكلة /المكان. وفي المرحله التالتة، المطلوب من الفريق يحط الكلمة في أغنية معروفة.
جاوب ماتخفش
اللعبة سعرها ٢٠٠ جـ، ومحتويات اللعبة مجموعتين كروت.
- ١٠٠ كارت “جاوب” ودي كروت أسئلة.
- ١٠٠ كارت”متخافش”، ودي كروت أحكام.
- وفي مفاجئة اسمها “appetizers” اللاعبين بيعرفوا هي إيه لما بيجيبوا اللعبة.
- لاعب بسحب كارت من “جاوب” وبيفتح الـ timer لمدة دقيقة ولازم يجاوب في الدقيقة دي، ولو حد شك في الإجابة اللاعب بيسحب كارت “متخافش”. كل لاعب بيبدأ بـ ١٠ نقط وبتزيد النقط ١٠ كمان كل دور لو اللاعب جاوب صح، لو مردش أو جاوب غلط او معملش الحكم بينقص ١٠ نقط.
كلاكيت اول مرة
سعر اللعبة ٢٠٠جـ، اللعبة بتتكون من لعبتين، “بوكيت الافلام” و”spin the wheel” وفي فيديو لشرح اللعبة بالتفاصيل هنا.
انوون
سعر اللعبة ٢٥٠جـ
كل فريق بيختار واحد يكون هو “انوون”، وانوون بيختار كارت من فئة مختارها الفريق المنافس. الفئات بتتكون من “إيه العلاقة”، و”قفشات x أغاني”، و”٣x١”، و”خمن الأغنية” وبيكون فيهم تحديات متميزة بتجبرك على تشغيل دماغك لحل الألغاز.