مؤخرًا حصل جدل في فكرة وجود أزمة البن والشاي وإننا ممكن مانلاقيهوش في وقت قريب، وإن مزاج المصريين في خطر. رئيس شعبة البن في غرفة القاهرة التجارية، حسن فوزي، وضح إن في نقص في مخزون البن نتيجة عوامل خارجية وداخلية، ومن أهم العوامل الخارجية هو ارتفاع سعر البن عالميًا بسبب تضرر المحصول في البرازيل، بسبب تغير المناخ وتعرض البرازيل لصقيع في أواخر السنة اللي فاتت، ده غير انتهاء المحصول في فيتنام، لكن مصر عاملة احتياطاتها.
في حواره لسكاي نيوز، صرّح فوزي: “ما يوجد في مصر من بن يكفي لمدة تتراوح من شهر إلى شهر ونصف الشهر، مشددًا على أنه “ما لم تنفرج هذه الأزمة قد نفقد فنجان القهوة، لإن مصر بتستورد 100% من حاجتها للبن”.
ومحمد رستم، أمين عام اتحاد المستوردين باتحاد الغرف التجارية، صرح للمصري اليوم: “مزاج المصريين مهم عند الحكومة” وكمل: “في 4 آلاف طن من منتجات القهوة بكل أنواعها في الموانئ، وفي أكثر من 6 آلاف طن شاي”، وبمجرد ما تحصل انفراجة عن الكميات دي من الموانئ هيكون عندنا مخزون كويس.
وعن الشاي، واحدة من شركات الشاي تقدمت بشكوى رسمية عاجلة إلى مجلس الوزراء ووزير التموين لتدبير العملات الأجنبية اللازمة لتمكين الشركة من استلام مستندات الشحن والتخليص الخاصة باستيراد حوالي 6 آلاف طن من الشاي اللي موجودة في الموانئ المصرية من أكتر من شهر، لإن الشركة بتستورد 60% من احتياجات السوق المحلية للشاي، وده لإن الشاي يُعتبر سلعة تموينية استراتيجية للمواطن المصري، خصوصًا إنه مابيتمش زراعته في مصر.
حسب احصائيات اللجنة الدولية للشاي، سجلت مصر المرتبة التالتة بين الدول العربية في استهلاك الشاي والقهوة. ومن أهم الدول المصدرة للشاي لمصر هي الهند وكينيا وسريلانكا، وبيوصل متوسط استهلاك الفرد 0.9 كيلو جرام سنويًا من الشاي والقهوة، واستهلك المصريين خلال السنة اللي فاتت حوالي 273 مليار لتر من الشاي والقهوة، بقيمة إجمالية تجاوزت 5 مليار جنيه، وفقًا لاحصائيات اللجنة الدولية للشاي.
وانتشر تصريح لوزير المالية، محمد معيط، عن أزمة الشاي، في حوار لبرنامج “حضرة المواطن” على قناة الحدث اليوم، بيطمن فيه الشعب المصري إن مفيش مشكلة في الشاي.
وأنت بتقرأ ممكن ييجي في بالك “طب احنا ممكن نحل الأزمة ونعتمد على نفسنا”، لكن نادر نور، أستاذ الزراعة، قال في تصريح لالمصري اليوم: “إن زراعة الشاي والبن بتحتاج إلى الأراضي الاستوائية وشبه الاستوائية، وبيتطلب الحرارة والرطوبة والأمطار الوفيرة، وتتراوح درجات الحرارة بين 20 إلى 27 درجة مئوية، بالإضافة إلى الأمطار الغزيرة، مؤكدًا أن كل محاولات زراعة الشاي والبن التي تم إجراؤها في مصر فشلت بسبب عدم توافر تلك العوامل المناخية”.
لحد دلوقتي ماتقلقش، هتفضل تشرب فنجان القهوة بتاعك وتشرب شاي بعد الغداء، وعندنا مخزون كويس. لكن لازم نفكر في اللي جاي، يمكن دي فرصة إنك تقلل من شرب الكافيين علشان صحتك، وعلشان تلاقي البن والشاي في الفترة اللي جاية.