في لقاء صحفي أجراه الفنان محمد صبحي مؤخرًا، وضح رأيه في بعض ورش الكتابة اللي بيلجأ لها بعض المؤلفين في الفترة الأخيرة، وورش الإخراج، وإنه مش بيفضلها نهائي ووصفها بإنها مرض مخيف بيهدد صدق الفن، بسبب اشتراك أكتر من شخص في الكتابة وفي الإخراج وده بيعكس رؤى مختلفة غير موحدة.
وفي اللقاء قال: “6 أو7 يتلموا عشان يكتبوا، كل واحد يقولك سيب ده أنا أعمله، وبتبقى ورشة إخراج من 6 كل واحد له حاجة، ازاي الفن ميخرجش من ذهن واحد؟ ازاي 6 يشتركوا في الكتابة؟ النحات علشان ينحت تمثال مبيجبش واحد ينحت العين وواحد الفم وواحد الأنف وواحد الجبهة، لأ.. بيخرج من عقله، عشان يعمل تمثال زي نهضة مصر، محمود مختار وغيرهم، احنا عندنا مرض مخيف بيهدد الفن وصدق الفن وهي مسألة الورش”.
ورش كتابة السيناريو والإخراج تعتبر شيء حديث في الفن، وعدد من المؤلفين بيقابلوها بحالة من الرفض وشايفين إنها بتتسبب في خلل درامي وعدم بناء الأحداث بشكل دقيق، لكن عدد من الورش نجحت وقدمت مسلسلات مهمة نجحت من وجهة نظر الجمهور والنقاد، وبياقبلها وجهة نظر مختلفة بتقول إن ورش الكتابة والإخراج بتقدر تقدم تنوع أكبر، وكل شخص بيكون قادر يقدم أحسن ما عنده في النقطة اللي هو شاطر فيها، فبيطلع عمل مميز وناجح بأركانه الدرامية المختلفة.
انتوا شايفين إيه؟