رغم إن المنافسة كانت صعبة بينه وبين منافسه الروسي لفرق السن الكبير اللي بينهم، بس قِدر العقيد المهندس محمد أبو ستيت إنه يجيب لمصر الميدالية الدهب ويفوز ببطولة العالم للكيك بوكسينج بعد تفوقه على منافسه نيكيتا سيروفيشكن بطل روسيا، البطولة دي كانت أصعب بطولة له لإنه أصر إنه يشارك فيها على الرغم من إنه كان عنده 42 سنة ومنافسه 27 سنة، بس رغم ده ، جهز نفسه للبطولة في سبع شهور واتدرب على إيد خمس مدربين وكان أدائه مشرف.
دي ماكانتش أول مرة يحقق فيها العقيد محمد بطولة العالم، فاز بيها قبل كده ست مرات بس للهواة مش للمحترفين، وبرغم إن موهبته في الكيك بوكسينج كبيرة بس ده مامنعوش إنه يبقى له كارير مهني تاني وينجح فيه كمان، نجح محمد أبو ستيت إنه ياخد بكالوريوس علوم عسكرية وماجستير في الهندسة الميكانيكية ودكتوراه في التحكم الحراري في الأقمار الصناعية.
وعن حبه لرياضة الكيك بوكسينج قال إنها اللي اختارته خصوصًا إنه كان بيلعب قبلها كونغفو لإن الكيك بوكسينج ماكانش وصل مصر وقتها، وأول مرة يلعبها لما كان في المنصورة وبعدها شارك في أول بطولة جمهورية سنة 1998 وبعدين في أول بطولة عربية دولية.
وعن بطولاته، شارك في خمس بطولات عالم وأخد فيهم أربع مراكز ذهبية وميدالية واحدة فضية، وشارك قبل كده في خمس بطولات عربية وأخد فيهم ميدالية ذهبية.
ولتميزه في كاريره الرياضي والمهني أخد لقب “عميد لاعبي العالم” وبعد فوزه مباشرة، القوات المسلحة هنأته بالبطولة باعتباره جزء من كيان الجيش المصري.