معجزة معمارية جديدة ممزوجة بالخط العربي بتجمع بين الأصالة العربية والطموح العالمي، متحف المستقبل، بهدف إنشاء معجزات بشرية وعلشان نسيب إبداع يعيش أكتر ما إحنا هنعيش، واللي حصد شهرة عالمية من قبل افتتاحه بسبب تصميمه الفريد من نوعه، ويعتبر أكتر المباني إنسيابية في العالم. وعلى عكس المفهوم المعتاد للمتاحف إنها بتعرض الماضي ورا نوافذ مغلقة، متحف المستقبل هيكون الأول في عرض أفكار المستقبل والتكنولوجيا والمشاريع والتجارب اللي بتمكن الزوار من التعرف على التكنولوجيا المستقبلية اللي هتغير حياة الناس.
على مساحة 30 ألف متر مربع، وبارتفاع 77 متر، بيتكون المتحف من 7 طوابق، وبيتميز بمعمار فريد من نوعه لإنه بدون أعمدة داخله، علشان كدة بيعتبر علامة فارقة في مجال الهندسة العمرانية. المتحف بيربط بين جسرين، الأول بيمتد لجميرا أبراج الإمارات بطول 69 متر، والتاني بيربطه بمحطة مترو أبراج الإمارات بطول 212 متر، والمتحف مع أبراج الإمارات والمركز المالي العالمي والمركز التجاري، هيكونوا منطقة تعتبر الأكتر إبداعًا وتأثيرًا في صناعة المستقبل ودعم مسيرة التنمية في الإمارات.
متحف المستقبل هيكون أول متحف في الشرق الأوسط حاصل على الإعتماد البلاتيني للريادة في تصميم أنظمة الطاقة وحماية البيئة، وهو أعلى تصنيف للمباني الخضراء في العالم، وده لإن المتحف هيعتمد على الكهرباء اللي بيتم إنتاجها من الطاقة الشمسية، من خلال محطة خاصة بالمتحف تم بنائها بالتعاون مع هيئة كهرباء ومياه دبي.
واجهة المبني مكونة من 1024 قطعة فنية مصنوعة كلها بالروبوتات بتزين الواجهة بأسلوب هندسي خاص بيوظف أحدث التقنيات في التصميم والإنشاء، كمان الواجهة الخارجية مصممة من زجاج تم تصنيعه بتقنيات مخصوصة لتحسين جودة الإضاءة الداخلية والعزل الحراري الخارجي، وده بيدي منظر جذاب خصوصًا في الليل، وبيحيط بالمتحف حدبقة بتضم 80 نوع وفصيلة من النباتات المختلفة، مزودة بنظام ري ذكي على أحدث مستوي.
