بواسطة: رحمة حجاج
حكاية “حلم حياتي” هي واحدة من حكايات مسلسل ” إلا أنا” الجزء التاني اللي بيتعرض دلوقتي على قنوات DMC. ودي بتعتبر أول بطولة مطلقة لمايان السيد، اللي كالعادة بتبدع في كل أدوارها وبتفاجئ الجمهور دايمًا بتطور أدائها في كل أعمالها.
مايان السيد، بتقدم دور “خديجة” اللي مصابة بالتوحد وبتحلم بالتمثيل والغنا بس بتتعرض للتنمر في الجامعة من بعض الناس اللي شايفين إنها “متخلفة” بسبب مرضها.
بيشارك مايان السيد في التمثيل: تيام مصطفى قمر وهنا داوود ومنة عرفة ويوسف عثمان وهدير عبدالناصر وعمر زكريا وسماح السعيد.
الجمهور تفاعل جدًا مع أداء مايان السيد، اللي فعلًا نجحت في تجسيد شخصية المصابين بالتوحد. وقالت مايان السيد في مداخلتها في برنامج “السفيرة عزيزة” اللي بيتعرض على DMC ، إنها قابلت بنت مصابة بالتوحد اسمها “ميريام علاء”، خلال تجهيزها لدورها في حلم حياتي، متابعة: «كانت بنت ذكية ولذيذة وموهوبة وبتحب التمثيل وبتغني وتملك صوتًا رائعًا وبتقلد المغنيين اللي بتحبهم، عندها صعوبة في التواصل البصري بس قريبة من أهلها واجتماعية».
ودي تقريبًا كانت شخصية “خديجة” اللي بتقدمها مايان السيد بالضبط.
وخلال أحداث المسلسل، بتتعرض مايان السيد للتنمر في مسرح الجامعة بعد ما مخرج المسرح اللي بيقوم بدوره يوسف عثمان، وافق إنها تمثل في مسرحية الجامعة. ووصفوها بـ”المتخلفة” علشان مابتقدرش تتواصل بصريًا بشكل طبيعي مع الناس.
تجهيزات المسلسل أخدت مجهود كبير خاصة من مصممة الأزياء “دنيا عبدالمعبود” اللي مجهودها فعلًا كان واضح في اختيار ألوان ملابس مايان السيد. الاستايلست دنيا عبدالمعبود كانت حريصة على تفاصيل ألوان الملابس علشان توصل الدور للمشاهدين بشكل واضح.
المصابين بالتوحد دايمًا بيختاروا الألوان الهادية في لبسهم وفي أي حاجة حوليهم، علشان الألوان الصريحة دايمًا بتبقى سبب في إثارة أعصابهم أو إنهم يحسوا بعدم ارتياح. دنيا عبدالمعبود كانت حريصة برضه على إنها تظهر عائلة “خديجة” بملابس بسيطة وألوان هادية، علشان توضح إنهم متقبلين حالة بنتهم اللي مصابة بالتوحد وإنهم بيحاولوا دايمًا يحافظوا على هدوئها.
مايان السيد قالت إنها كانت مبسوطة جدًا لما اتعرض عليها سيناريو المسلسل ووافقت عليه بشكل سريع لإنها بتحب الأدوار الصعبة اللي بتحتاج مجهود، وكمان علشان اتعرضت للتنمر وهي صغيرة بسبب هدوئها.
حكاية “حلم حياتي” من تأليف “يوسف وجيه” وإخراج “ياسمين أحمد كامل “.