بسبب الظروف العصيبة اللي مش بس بتمر بيها البلاد العربية ولكن كمان العالم كله بسبب تداعيات فيروس كورونا، واللي خلت كتير من الحفلات الغنائية تتلغي، أو إنها تلجأ للحل الإلكتروني علشان تحافظ على حياة الناس زيّ الحفلات الغنائية الأونلاين اللي شوفناها في الفترة الأخيرة على منصات السوشيال ميديا زيّ تطبيق تيك توك.. ولكن في النهاية مفيش زيّ إحساس إنك تحضر حفل غنائي طبيعي وفي الأماكن الكبيرة اللي اتعودنا عليها، علشان نحس بالجو الحقيقي للحفلات الغنائية.. مش كده؟ الخبر السعيد هو إن الفنانة الكبيرة ماجدة الرومي هتحيي أول حفل غنائي ليها في مصر السنة دي في قصر القبة.
وبكده هتكون ماجدة الرومي أول مطربة لبنانية تغني في أحد أكبر القصور الملكية التاريخية في مصر، ونشرت الفنانة ماجدة على حسابها الخاص بتويتر، تغريدة بتأكد إحيائها للحفل الغنائي في قصر القبة يوم 2 من شهر أبريل القادم ومن المتوقع إنها تغني مجموعة من أكتر أغانيها المفضلة لجمهورها بالوطن العربي بشكل عام، والجمهور المصري بشكل خاص.. واللي قامت بغنائهم في حفلات غنائية كتيرة وكبيرة قبل كده، فتعالوا نشوف الأغاني دي وهي بتغنيها بشكل رائع في حفلات قبل كده..
كلمات
اسمع قلبي
كن صديقي
عم يسألوني عليك
ماجدة الرومي قيمة وقامة كبيرة، وأغانيها كلها بلا استثناء محققة نجاحات جماهيرية عظيمة، وسماع الأغاني دي بصوتها لايف على المسرح، فعلًا حاجة تفرح لدرجة إن إحنا مش قادرين نستنى!