ليه بهاء سلطان طيب كده؟ أسباب وإجابات لتساؤل “وليه طيب، عشان طيب؟”

الجمهور بيتساءل، بهاء سلطان ليه إنسان طيب وعلى نياته للدرجة دي؟ كل كلمة بيقولها بتأكد المعلومة لدرجة إن البعض شكك في الموضوع من كتر ما هو خارق للطبيعة -أو يمكن بالنسبة للزمن اللي احنا فيه بس- لكن من الواضح إن الفنان طيب كده فعلًا، دوّرنا وراه ولقينا أسباب كتير تأكد الموضوع، من أغانيه لتصريحاته وكلامه في اللقاءات، حتى من كلامه على السوشيال ميديا.

بهاء سلطان المطرب المصري اللي ابتدى مشواره مع بداية الألفينات وقدر يشق طريق مختلف عن زمايله في الوقت ده، خصوصًا إن الفترة دي كانت فترة تغيير وإبداعات مختلفة، لكن بهاء اختار لنفسه سكة مختلفة خلّته قريب من الجمهور. وكلمة “قريب من الجمهور” دي نقصد بيها المستوى الفني وكمان المستوى الإنساني، ليه بقى؟

حفلة بعد غياب وسعرها كان بسيط

بعد غياب سنين كتير، اتحرمنا فيها من الفنان بهاء سلطان ووجوده اللطيف في الساحة الفنية، وبعد مشاكل كتير مع جهة إنتاجية، والخلافات أدت لمنع ظهور الفنان وغيابه عننا لفترة، لكن بعد الغياب ده رجع لنا الفنان بهاء سلطان، وأول حفلة بعد الرجوع ده كان متوقع إن سعر التذكرة فيها يكون غالي شويتين، لكن المفاجأة كانت إن سعر التذكرة 300 جنيه، وده بالنسبة لمتوسط أسعار تذاكر الحفلات دلوقتي بيكون مش غالي، خصوصًا لو فنان راجع للساحة الفنية بعد غياب والناس مشتاقة تسمعه لايف، وبهاء سلطان رجع لجمهوره بسعر يقدروا يشوفوه به، لدرجة إن في ناس ماكانتش مصدقة.

المطرب اللي بيسأل الجمهور بعد كل أغنية “مبسوطين؟”

عادي تسمع من المطرب في الحفلة مرة ولا مرتين إنه بيتكلم مع الجمهور، وازيكم عاملين إيه مبسوطين في الحفلة والكلام ده، لكن بهاء سلطان بعد كل أغنية بيسأل الناس هل الأغنية عجبتهم ولا لأ، طب لو في أغنية مش عايزينها قولوا ونغيرها، وبيعتذر كمان إن مافيش أغاني جديدة والحفلة كلها أغاني قديمة ومعروفة، يا جدع أنت ذوق كده ليه.

التواضع في ردوده

ممكن تلاقي فنانين متواضعين أو مش مغرورين عادي، بس مستحيل تلاقي التلقائية والتواضع في ردود أفعال بهاء سلطان دي في حد تاني، تحس إنه صاحبك اللي بيخدم ويستجدع مع كل الناس، ولما حد ييجي يشكره يتكسف ويبقى رده الوحيد “ربنا يخليك والله”.

والموضوع ده كل الناس لاحظته مؤخرًا في ردوده للإعلام، وبالذات لما الفنان محمد هنيدي حب ينكشه وركب وشه على صورة بهاء سلطان، ولما بهاء وصله الموضوع ده رد بمنتهى التلقائية والطيبة والتواضع في لقاء مع برنامج “et بالعربي”: “بشكره، والله العظيم على راسي يا أستاذ محمد وحياة ربنا، ربنا يخلي حضرتك، أنا ليا الشرف والله، أنا مبسوط إن الحاجات دي وصلتله”.

صدقيني أنا عايز أعمل أي حاجة عشان أرضيكي

من زمان بهاء سلطان بيبدي حسن نواياه، واستعداده إنه يعمل أي حاجة علشان يمحي الخلافات بينه وبين حبيبته، وبيقول لها الكلام ده بمنتهى الطيبة، لدرجة إنه عايز يبقى حد يستاهل بجد يبقى ليها، مش مجرد كلام رومانسي عادي، ما احنا ياما سمعنا وشوفنا أغاني رومانسية بتبالغ، لكن تحس إن الكلام نفسه طيب ونواياه كويسة.

الأغنية دي كانت أول مرة تطل على الجمهور في فيلم “أنا مش معاهم” سنة 2007.

أنا زعلتك في حاجة! طب إيه يا حبيبي هي؟

في حين إن كل الرجالة بيشتكوا من موضوع “مالك؟ مافيش” أو من حتى فكرة العتاب على مشاكل في علاقتهم مع اللي بيحبوهم، الفنان بهاء سلطان خرق القاعدة دي وفضل يسأل أنا زعلتك في حاجة؟ طب إيه يا حبيبي هي؟ بتداري عينك ليه لما بتيجي في عينيا؟

يعني مش بس سألها وهي مارضيتش تقول، ده هو اللي واخد باله إنها زعلانة منه وبتداري عينيها منه، ومصمم يسألها هو زعلها في إيه، لا وكمان مصمم مش ماشي قبل ما نتكلم ماقدرش أسيبك تتألم.. أغنية 5 دقايق كاملين بيحايل في الست علشان يصلحوا اللي بينهم.

وليه طيب؟ عشان طيب؟

السبب الأشهر على الإطلاق مؤخرًا، أغنية من أجدد أغاني الفنان، وبرضه ماتخلاش عن الطيبة والنقاء في علاقته باللي بيحبه، لدرجة إن لما الموضوع باظ خالص قال “ودلوقتي خلاص همشي أنا وقلبي اللي دايب فيك” الراجل يقطع قلبك وهو لسه بيحب ومتعلق، لكن برضه مش هيعمل قلق وهو بينهي العلاقة وهيمشي في منتهى الهدوء، حتى لو بيتقطع من جواه، وبيقعد يلوم نفسه إنه من الأول حب وبيّن اهتمامه، وبيقعد يندب في الآخر على اللي حصل له ويتساءل “وليه طيب؟ عشان طيب؟ عشان يعني اللي في قلبي على لساني؟” يا فنان آدي آخرة الطيبة مع اللي مايستاهلوش.

الشخص اللي تتمنى تشوفه في يومك

في نهاية المقال، حابين نختم بكلام حد من اللي بيحبوا بهاء سلطان وقال وجهة نظر بنتفق فيها جدًا..

“أستاذ بهاء سلطان هو مثال للراجل اللي كل إنسان يتمنى يكون على علاقة به، تتمنى كده يكون حتى خالك أو تبقى بتشوفه على أول شارعكم في يوم زحمة سخيف فلما يبتسم لك اليوم يروق.

ده الراجل الوحيد تقريبًا اللي ممكن أبلع له الزلط، علشان تاريخ الشهد اللي بينقط من لسانه والطيابة والتربية تشفع له تمامًا.. تحس طول الوقت عينيه بتبعت طبطبة وأحضان.

حاجة كده مثال على ازاي تكون إنسان طيب في وسط من الوحوش. موهبة ولطافة وأدب وجمال مفيش كده.

يعني يا أستاذ بهاء لو جيلنا جيل تعيس، فحظنا خدناه في وجود صوت زي صوتك وراجل زيك يبسط جيلنا.

ويظل السؤال: وليه طيب؟ عشان طيب. بجد طيب قوي.”.

آخر كلمة: ماتفوتوش قراءة: حاجات نفسنا ترجع: كرينجات أغاني ألفينات