ماكانتش صدفة إن الشهر اللي يسيبنا فيه يبقى هو الشهر اللي بيمجد تاريخه الفني، واللي ارتبط اسمه بيه، محمود ياسين هو أكتر فنان مصري شارك في أفلام بتتكلم عن حرب أكتوبر، وكان بطلها وساب بصمته في كل عمل فيهم، وخلت منه أيقونة سينما حرب أكتوبر، وفي ذكرى وفاته هنتكلم عن أعمال خلدت ذكرى النصر وخلدت اسم محمود ياسين معاها كبطل أفلام حرب أكتوبر.
الرصاصة لا تزال في جيبي
الفيلم من قصة إحسان عبد القدوس وإخراج حسام الدين مصطفى، كل أحداثه اتصورت في الأماكن الحقيقية اللي حصلت فيها الحرب في بورسعيد والسويس والإسماعلية، بس كانت تحت قيادة وإشراف الجيش، الفيلم بيتكلم عن الفترة من بعد النكسة لحد حرب أكتوبر، والفيلم بيصور مشاهد الحرب كإنك حضرتها بكل تفاصيلها وأحداثها، هتعيش مع كل مشهد فيها كإنك كنت معاهم وكل مشهد هتتفاعل معاه بكل جوارحك كإن الحرب مافاتش عليها 48 سنة، وشارك محمود ياسين في البطولة الفنان حسين فهمي وسعيد صالح وصلاح السعدني.
أغنية على الممر
أول أفلامه الوطنية وكانت في وقت حروب الاستنزاف، الفيلم بيتكلم عن حياة 5 مجندين اتحبسوا في ممر في الصحرا، وده بعد ما تم استهداف واستشهاد جميع زمايلهم اللي في الكتيبة، والفيلم هيحكي حياة كل واحد من الخمسة دول، وازاي اتغيرت بعد النكسة، وكان من بطولة محمود ياسين وصلاح السعدني وصلاح قابيل ومحمود مرسي.
الوفاء العظيم
بدور
الفيلم من إنتاج 1974 وأحداثه بتدور من خلال بنت بتقوم بالنصب والاحتيال لحد ما تقابل محمود ياسين ويساعدها إنها تغير من حياتها، وبعدها هيتم تجنيده خلال الحرب والفيلم هينتهي باستشهاده.
حائظ البطولات
الفيلم ده تم منع عرضه لأكتر من 15 سنة، بيتكلم عن علاقات إنسانية متشابكة لجنود وظباط في الجيش المصري، وعن المراحل اللي مروا بيها في تطوير الدفاع الجوي ومرحلة بناء الصواريخ.
محمود ياسين كان موهبة استثنائية فذة، ماكانش مجرد ممثل بيأدي دوره، لأ ثقافته كانت دايمًا بتظهر عليه في الطريقة اللي بيأدي بيها كل دور في أفلامه.