بعد مجهودات الحكومة المصرية، وخصوصًا وزارة التعليم العالي والبحث العلمي، لتطوير التعليم في مصر، عملولنا ٤ جامعات أهلية جديدة، وهما جامعة الملك سلمان الدولية بمحافظة جنوب سيناء، وليها ٣ فروع، فرع في مدينة الطور، وفرع في شرم الشيخ، وفرع في راس سدر اللي تم افتتاحها يوم السبت الموافق 31 من أكتوبر 2020 بحضور الرئيس عبد الفتاح السيسي والأمير فهد بن سلطان آل سعود أمير منطقة تبوك، وجامعة العلمين الدولية بمدينة العلمين الجديدة بمحافظة مطروح، وجامعة الجلالة في هضبة الجلالة بمحافظة السويس، وجامعة المنصورة الجديدة في مدينة المنصورة الجديدة بمحافظة الدقهلية. والجامعات دي هيكون فيها ٥٠ كلية متنوعة بتخصصات جديدة زي الرقمنة.
ايه هي الجامعات الأهلية؟
الجامعات الأهلية هي مش جامعات خاصة، ولا جامعات حكومية، هي جامعات غير هادفة للربح، لأن كل المصاريف اللي بتدفع فيها مش بتروح في جيب حد، أو اصحاب الجامعات. الجامعات دي بتكون مملوكة للدولة أو جهة ما، ولكن لا يملكها شخص، فكل اللي بيتدفع من الطلاب بيروح للتعليم وضمان الجودة والمستوى.
وبعد ما أقبل طلاب الثانوية العامة على التقديم في الجامعات الجديدة دي، صرح المتحدث الرسمي لوزارة التعليم العالي، الدكتور حسام عبد الغفار، إنه تم مد فترة التقديمات في الجامعات دي بعد ما كان آخر يوم للتقديم يوم ٣٠ من شهر أغسطس ليوم ٢ من شهر سبتمبر. وقال إن مصر بقت التالتة على المستوى العربي في جودة التعليم، وأضاف إن مصاريف الجامعات الأهلية أقل من الجامعات الخاصة بشكل واضح، فمصاريف الجامعات الأهلية بتتراوح بين ٤٠ ألف ل ٧٠ ألف جنيه مصري في مختلف التخصصات، ماعدا الطب البشري وطب الأسنان اللي بيتراوحوا بين ٩٠ ألف ل ١١٠ الف جنيه مصري.
مواقع الجامعات عليها كل البرامج وشروط التقديم، والطالب بيعمل حساب شخصي وبيرفع عليه كل ملفاته وأوراقه الرسمية، وبعد كدة بيكون في اختبار قبول باللغة الانجليزية عن مجموعة من المعلومات العامة، والتفكير النقدي، واللغة الانجليزية، وبتكون الامتحانات سهلة مش معقدة علشان تحدد مهارات وقدرات الطالب. وبعد القبول بيكون في مقابلة شخصية وبيكون في كشف طبي، والجامعات بتوفر سكن للطلاب وتأمين صحي.
ومن مميزات الجامعات الأهلية، إنها بتقلل اغتراب الطلاب خارج مصر، وإن طريقة التعليم هتكون “من التعليم للتوظيف” فعلشان كدة واخدين في اعتبارهم الموقع الجغرافي، فمثلا هتلاقي كليات السياحة والضيافة وكليات الفن والتصميم في شرم الشيخ، وكليات التعدين في الجلالة، وكليات العلوم الادارية في راس سدر، وكليات الاعمال وكليات الفنون والتصميم في العلمين.
وبتوفر الجامعات الأهلية مجالات تانية كتير زي العمارة، واللغات التطبيقية، والدراسات القانونية، والانتاج الإعلامي، وعلوم وهندسة الحاسبات، وعلوم وهندسة المنسوجات، وغذاء وصناعات غذائية، والتمريض.
