للمرة الأولى في الشرق الأوسط، تمت في المملكة العربية السعودية عملية جراحية في المخ لتخفيف معاناة الاكتئاب، اللي كان بيعاني منه المريض بشكل مزمن لأكتر من 25 سنة، والعملية نجحت في سبق طبي بيحصل لأول مرة، بالتدخل الجراحي لعلاج مرض الاكتئاب.
الفريق الطبي اللي قام بالعملية اتشكل من أطباء أمراض نفسية وأطباء جراحة المخ والأعصاب، لمناقشة الحالة وقرار التدخل الجراحي، للتخفيف من الأعراض الشديدة اللي بيعاني منها المريض، والقلق المصاحب للاكتئاب.
الفريق الطبي قام بإجراء عملية “بضع التلفيف الأمامي في الجهتين” تحت التخدير الكامل، والعملية نجحت بدون أي مضاعفات تُذكر، واتحسنت حالة المريض المزاجية والنفسية، ورجعت عدد ساعات نومه لمعدلها الطبيعي، وابتعد عن الحزن الدائم والتفكير الزائد في الموت، والقلق من المستقبل.
مدينة الملك سلمان الطبية في المدينة المنورة بتقدم خدمة الجراحة العصبية لمرضى الاكتئاب، من خلال فريق طبي في جراحة المخ والأعصاب عن طريق التدخل الجراحي في الدماغ، باستخدام تقنيات متطورة ودقيقة جدًا، للتخفيف من أعراض الاكتئاب، والخدمة دي تعتبر الوحيدة من نوعها في الشرق الأوسط.
العلاج النفسي -اللي لسة لحد دلوقتي ناس بتوصمه- بيتطور بشكل كبير عن اللي متعودين نشوفه، السنة اللي فاتت في الولايات المتحدة كان بيتم مناقشة زرع جهاز كهربائي في الدماغ علشان يعالج حالات الاكتئاب الحادة، الجهاز ده عبارة عن عبوة صغيرة بحجم علبة الكبريت، بيتحط في دماغ المريض وممكن يكتشف حالات الاكتئاب الشديدة ويعالجها. وقالت سارة، مريضة تم تثبيت الجهاز في دماغها لأكتر من سنة، إنه غيّر حياتها.
الجهاز ده لسه تحت قيد التجارب، وفي غيره كتير، وغير العملية الجراحية لعلاج الاكتئاب، لكن القصد إن العالم بيدور بكل جهده على الحلول اللي تساعد المرضى، اللي بيعانوا من أمراض نفسية بتأثر على حياتهم وعلى نشاطهم، مش بس بيهتموا بالعلاج النفسي بطرق تقليدية ومعروفة.