الحلقة الـ 17 من مسلسل جعفر العمدة، عملت ضجة كبيرة على مواقع التواصل الاجتماعي، بعد ما اتجوزت وداد من شوقي فتح الله، وهي على ذمة سيد.
مشهد سيد وهو بيتفرج على وداد في الكوشة مع راجل تاني وحزنه ولخبطته، خلت الناس كلها تتكلم عن شر وداد وجبروتها، ويسألوا: ازاي ينفع تتجوز وداد واحد وهي على ذمة واحد تاني؟
لما اتكلمنا مع المحامي زياد أحمد، وضح لنا الوضع القانوني للي هي عملته، واكتشفنا إنها مش بس قادرة، دي ذكية ومياه من تحت تبن كمان.
بيقول زياد إن وداد أكدت في أحداث المسلسل إنها اتقدمت بطلب خلع من سيد بقالها كذا شهر وقاعدة معاه في نفس البيت علشان مايحسش بأي تغيير.
وبيوضح: “لو كانت ادت عنوان غلط في الدعوى، واتفقت مع المحضر يسجل عدم استدلال على مكان الزوج، ساعتها هيتم الحكم بالخلع غيابي وتبقى مطلقة بشكل قانوني، حتى لو جوزها مايعرفش الكلام ده”.
بيوضح زياد إنها ماينفعش تتجوز غير بعد ما تمر شهور العدة، وبيأكد إن لو اللي حصل غير كده يقدر جوزها يرفع عليها قضية زنا، لو قدر يثبت إنها كانت مع راجل تاني خلال شهور العدة.
وزيّ ما اتضح لنا في المسلسل، عقد البيوتي سنتر اللي كانت وداد بتزن عليه كان عقد طلاق، ومضت سيد عليه من غير ما يعرف وقضت شهور العدة وهي معاه.
قادرة يا وداد وإيدك طايلة!