“بس الأول، قهوة”. تقريبًا كلنا نقدر نُجمع على إن القهوة شيء مفضَّل بالنسبالنا، وفي بعض الأحيان، بتكون الطريقة الوحيدة لبدء يومنا. ففي حين إن البعض بيشربها على فترات متباعدة، والبعض الآخر بيقدمها كمشروب ضيافة في بيته، فالأكثرية بيعتبروا القهوة هي المشروب السحري اللي ينفع في كل وقت.
تاريخ زراعة نبات القهوة مبهر جدًا، فالبداية كانت من مئات السنين في قلب إفريقيا وأمريكا الجنوبية. بيعتقد البعض إن كلمة “coffee” تأصلت في دولة إثيوبيا وتحديدًا منطقة “كافا” الإثيوبية، اللي تم اكتشاف القهوة فيها، بينما بيدّعي البعض الآخر إن الكلمة تشكلت من الكلمة العربية “قهوة”.
في المقال دا هنعرض أنواع القهوة المختلفة لكل عشاق ومدمني القهوة!
القهوة التركي
القهوة التركي هي واحدة من أشهر أنواع القهوة اللي تقريبًا بتلاقيها في كل مكان. عادةً ما بيتم تقديمها مع كوب من المياه جنبها، وتقدر تميز القهوة التركي اللي جودتها عالية من خلال الفوم أو زي ما بنقول عليه “الوش” اللي بيكون فوق القهوة.
معلومة هامشية: البن التركي تم إدراجه ضمن قائمة الموروث الثقافي العالمي الغير ملموس عن طريق منظمة اليونسكو.
قهوة مغربية نص نص
زي اسمها، القهوة دي بتتكون نصها من اللبن ونصها من القهوة. النوع دا من القهوة أو كما يُطلق عليها بالمغربي “قهيوة” عادةً ما بيُقدّم في كوب زجاجي ومذاقه هيصدمك من الروعة. في القهوة وتفانينها، المغربيين يقدروا بسهولة ينافسوا الإيطاليين.
قهوة عربي مُحلّاة بالتمر
القهوة العربي “الجهوة” بتستخدم للضيافة في أغلب دول الخليج العربي، كعلامة على الكرم وحسن الضيافة. الفرق الأكبر ما بين القهوة التركي والقهوة العربي هو إن الأخيرة بتحتوي على عُشب الهال مع بعض التوابل الأخرى، وعادةً ما بيتم تقديمها مع البلح أو أنواع مختلفة من التمور العربية الأصيلة.
قهوة لبنانية بيضاء
الكوب دا من تقاليد المطبخ اللبناني، القهوة البيضا أو القهوة اللبنانية بتُقدّم دايمًا في نهاية الوجبات. المفاجأة بقى إن القهوة البيضا لا تحتوي على قهوة فعليًا؛ فهي مزيج من المياه الساخنة مع مياه ورد البرتقال وبعض السكر أو العسل للتحلية.
جَبَنَة
تم إطلاق الاسم على النوع دا من القهوة بسبب إنه بيتعمل في إناء خاص يطلق عليه جَبَنَة. القهوة دي أصلها سوداني وبيتم طحنها بالإيد وبتُقدّم في أكواب من البورسلين، مع تتبيلها بالقرنفل أو القرفة، مع نبات الهال، والجنزبيل والفلفل.
مزغران
القهوة دي بيُطلق عليها عادة “القهوة المثلّجة الأصلية”، وهي نوع من أنواع القهوة الساقعة اللي بترجع أصولها للجزائر. القهوة دي كمان بتتعمل بليمون معصور.
