امبارح الأحد 14 من أغسطس، الساعة تمانية الصبح، اتقطعت الكهربا عن منطقة المنيرة إمبابة، وبعد خمس دقايق من الإنقطاع وبعد بدأ تشغيل مولد الكهربا الموجود في كنيسة أبو سيفين ودار الحضانة الخاص بيها، حصل ماس كهربا في واحد من المكيفات الموجودة في الدور الرابع من مبنى الكنيسة أول ما تيار الكهربا رجع يشتغل مرة تانية.
الماس الكهربائي ده كان هو السبب في حريق الكنيسة الضخم على حسب بيان وزارة الداخلية، واللي راح ضحيته 41 قتيل و14 مصاب من المصليين الـلي كان عددهم على الأقل 150 شخص موجودين داخل في مبنى الكنيسة لحضور القداس في وقت الحريق، وكان من بين الضحايا 3 أفراد من قوات الشرطة.
قال الشهود إن المطافي حضرت للتعامل مع الكارثة في أقل من ربع ساعة، وذكرت وزارة الصحة من خلال تويت إنها بعتت 30 عربية إسعاف لمنطقة الحريق واللي قدروا يسعفوا ضحايا الحريق في أسرع وقت ممكن.
أما المتحدث باسم وزارة الصحة، دكتور حسام عبدالغفار، فأكد على خروج اتنين من المصابين بعد تلقيهم العلاج اللازم، وقال إنه كان في 4 حالات غير مستقرة بعد نقل كل الضحايا للمستشفيات، ولكن لحد اللحظة انخفض العدد إلى حالة واحدة غير مستقرة، وأكد إن باقي حالات المصابين في وضع صحي مستقر.
ووضح عبدالغفار إنه هيخرج عدد أكبر من المصابين من المستشفي خلال الساعات اللي جايه، واللي أكد إن عددهم حاليًا هو 12 مصاب، منهم سبعة في مستشفى امبابة العام، وخمسة في مستشفى العجوزة.
وأعلنت الكنيسة القبطية الأرثوذوكسية في بيانها الرسمي بخصوص صلاة تجنيز ضحايا كنيسة أبو سيفين في إمبابة إنه تم اتخاذ القرار بإقامة صلوات التجنيز على مرحلتين، الأولى كنيسة السيدة العذراء الأثرية في الوراق، والتانية في كنيسة السيدة العذراء ورئيس الملائكة ميخائيل في الوراق، وهيكون الأنبا يوحنا أسقف شمال الجيزة، والأنبا ثيؤدوسيوس أسقف وسط الجيزة حاضرين الصلوات.
وقد أعلن مصطفى مدبولي، رئيس مجلس الوزراء عن قرار وزارة التضامن الإجتماعي بصرف 100 ألف جنيه لكل ضحية، واللي هيتم صرفها فورًا لأسر الضحايا، بالإضافة لمبلغ يصل لـ 20 ألف جنيه للمصابين، حسب درجة إصابتهم.
انتابت حالة من الحزن الشديد والتعاطف جموع الشعب المصري من امبارح، وخصوصًا مع والدة الأطفال التوائم التلاتة اللي ماتوا في حريق الكنيسة، وهما (مريم تامر وجيه، وبارسينا تامر وجيه، وابرام تامر وجيه) واللي لسه موجوده لحد دلوقتي في المستشفى في غيبوبة، وأعلنت وزارة الصحة إنها هتفوق بكره، وهي لحد اللحظة ماتعرفش عن خبر موت أولادها التلاتة.