اتفاقية بـ 8.5 مليار دولار لمجموعة siemens الألمانية، لأكبر صفقة في تاريخها مع مصر لبناء 3 خطوط سكة حديد لقطارات فائقة السرعة، بطول 2000 كيلومتر. الاتفاق تم بين الهيئة القومية للأنفاق في مصر وتحالف من شركة سيمنز موبيلتي وأوراسكوم للإنشاءات والمقاولين العرب. وبتنفيذ الاتفاق ده، مصر هتمتلك سادس أكبر نظام للسكك الحديدية عالية السرعة في العالم.
المشروع هيربط بين 60 مدينة للأشخاص والبضائع في كل أنحاء الجمهورية، وهيشمل 41 قطار عالي السرعة، و94 مجموعة قطارات إقليمية عالية السعة، و41 قاطرة شحن، الأرقام دي حسب بيان شركة سيمنز اللي نشرته CNN. وصرح المستشار الألماني، أولاف شولتز، إن الحكومة المصرية بتتخذ من خلال “الاستثمار الضخم قرارًا جريئًا ذي بعد نظر”، حسب كلمة مسجلة لشولتز نشرتها الرئاسة المصرية.
وعن تفاصيل المشروع، الـ 3 خطوط المقرر إنشائهم هيكون الخط الأول فيهم له أهمية استراتيجية بتساوي أهمية قناة السويس، وهيربط بين العين السخنة على البحر الأحمر وبين الإسكندرية والعلمين ومطروح على البحر المتوسط بطول 660 كم، والخط التاني هيكون طوله حوالي 1100 كم وهيوصل بين القاهرة وأبو سمبل، مرورًا بالأقصر وأسوان، وده أهميته هتكون في ربط العاصمة بالمراكز الاقتصادية الناشئة في الصعيد. أما الخط التالت هيكون طوله 225 كم وهيمتد من قنا لسفاجا، مرورًا بالغردقة.
ومن المتوقع إن الخطوط دي هتقدم حوالي 500 مليون رحلة سنويًا، بين الـ 60 مدينة. وبيتم حاليًا تجهيز شبكة السكك الحديدية بالكامل علشان يتم توصيل 41 قطار عالي السرعة من طراز Velaro، كل قطار عبارة عن 8 سيارات “عربات”، و94 قطار من طراز ديسيرو عالية السعة كل قطار فيه 4 سيارات “عربات”، ده غير 41 قاطرة شحن من طراز Vectron.
بعد التنفيذ، مشروع سيمنز في مصر هيكون خطوة مهمة وكبيرة في مساهمة مصر في تقليل انبعاثات الدخان والكربون، وتحسين جودة الهواء لإن القطارات كهربائية، وده ضمن استثمارات الدولة في البنية التحتية اللي بتتم في خلال السنين الحالية. ده غير قيمة المشروع ودوره في تعزيز مكانة مصر وموقعها التجاري إقليميًا وعالميًا، بعد ربط 60 مدينة بـ3 خطوط، وده هيأثر في حركة التجارة بشكل كبير وهيكون له دور في ريادة مصر اقتصاديًا.
الاتفاق تم خلال استقبال الرئيس السيسي يوم السبت لرولاند بوش، الرئيس التنفيذي لشركة “سيمنز” الألمانية، وبحضور الفريق كامل الوزير، وزير النقل، والمهندس سيد فاروق، رئيس مجلس إدارة شركة المقاولين العرب، والمهندس أسامة بشاي، رئيس مجلس الإدارة والعضو المنتدب لشركة أوراسكوم للإنشاءات، وبحضور فرانك هارتمان، سفير ألمانيا في القاهرة، ومايكل بيتر، رئيس مجلس إدارة شركة “سيمنز موبيليتي”.