انتشرت أخبار عن هجوم الفنان أحمد آدم على الفنان تامر حسني في برنامج (بني آدم شو) على قناة الحياة، وقال آدم: “تامر حسني مين مش واخد بالي، مش كفاية عليك كده بقا ولا إيه، أول ما طلع طلع لنا شعر صدره وقعد يمصمص في شفايفه ويسبّل للبنات”.
وأضاف: “بيقدم شوية أغاني تعبانة.. إسفاف، وأفلامه وحشة جدًا، وهو اللي بيألف وبيخرج وهو اللي بيعمل موسيقى تصويرية، وهو اللي بيقطع التذاكر بيعمل كل حاجة”.
رغم انتشار الكلام السابق على السوشيال ميديا، فالحقيقة مختلفة جدًا، لإن الفنان أحمد آدم قدم من خلال برنامجه تجربة اجتماعية، حاول يثبت من خلالها إن التريند بيجذب السلبيات بس.
بدأ أدم الحلقة الأخيرة من برنامجه وهو بيشرح التجربة: “تعالوا نلعب لعبة، ونقدم مقطعين فيديو واحد إيجابي وواحد سلبي، ونشوف أي تريند اللي هينتشر وأراهنكم دلوقتي إن السلبي هينتشر”.
بدأ كلامه عن الفنان تامر حسني بكلام إيجابي، وقال: “تامر حسني أول ما طلع قلنا يومين وهيخلص لكن هو بيعمل عظمة، بيقدم أغاني مكسرة الدنيا، وأفلامه مكسرة الدنيا وبيعرف يفكر ويطور من نفسه، وبيخرج ويمثل ويكتب سيناريو، وبيفكرني بأنور وجدي”.
وبعد كده قال آدم الكلام السلبي اللي ذكرناه في البداية، وزي ما راهن الجمهور إن الكلام اللي هينتشر هو الكلام السلبي بس، فعلًا انتشر الكلام السلبي وبقى تريند زيّ ما احنا شايفين.
رد الفنان تامر حسني بشكل إيجابي على تجربة آدم، وأكد إن مفهوم التريند خلى الناس خسرت مبادئها علشان تظهر تحت دائرة الضوء حتى لو لوقت قصير.