في ثنائيات كده في السينما المصرية، بيتكرروا كتير وبناخد على إننا نشوفهم مع بعض كتير، زي مثلًا الزعيم عادل إمام والفنانة يسرا، تامر حسني ومى عز الدين، أحمد مكي ودنيا سمير غانم وغيرهم كتير. ولكن في نجوم شوفناهم مجتمعين مرة واحدة بس أو بالكتير مرتين في عمل مع بعض، وحاسين إنهم كانوت ممكن يكونوا دويتو أو ثنائي قوي، زي الأمثلة اللي ذكرناها من شوية. لأن الكيميا اللي كانت بينهم في الفيلم، كانت مؤشر جيد إنهم كانوا هيحققوا نجاحات مستقبلية لو كانوا مثلوا حاجات تانية مع بعض. فدول مجموعة من الكابلز، اللي نحب نشوف أكتر لأعمالهم مع بعض في الأفلام اللي جاية..
هاني سلامة وحلا شيحة
فيلم السلم والتعبان من أكتر الأفلام اللي الناس بتحبها ولسه بتتفرج عليها لحد دلوقتي، وسبب كبير في ده هو اجتماع هاني سلامة وحلا شيحة في لوكيشن واحد، وقدروا من خلال شخصياتهم في الفيلم إنهم يشدونا نتابع قصتهم وكمان نتعاطف مع ظروفهم ومشاكلهم.. ولإنهم اجتمعوا مرة واحدة بس، فإحنا حابين نشوف أعمال أكتر مع بعض!
غادة عادل وخالد أبو النجا
خالد أبو النجا وغادة عادل شكلوا ثنائي رائع لما شوفناهم مع بعض في فيلم “في شقة مصر الجديدة”، ولإن الاتنين فنانين من العيار التقيل، فخلونا نقتنع بقصتهم في الفيلم.. وبرغم إنهم اجتمعوا بعدها بسنين في فيلم “على جثتي”، ولكن خالد كان طالع ضيف شرف.. فإحنا مش هنقبل بأقل من فيلمين تلاتة من بطولتهم هما الاتنين مع بعض!
منة شلبي وشريف سلامة
شريف سلامة ومنة شلبي كانوا عاملين روح مرحة ولطيفة لما ظهروا مع بعض في فيلم إذاعة حب، وبرغم إنهم ظهروا في مرة تانية في مسلسل “حرب الجواسيس” بس إحنا لسه ماشبعناش منهم.. فعايزين نشوفلهم أعمال سينمائية أكتر مع بعض.
أحمد عز ودنيا سمير غانم
فيلم 365 يوم سعادة كان من بطولة أحمد عز ودنيا سمير غانم، وشوفنا إزاي انسجامهم مع بعض في التمثيل كان حلو ومميز، فإحنا أكيد هنبقى مبسوطين جدًا لو عرفنا إن إحنا هنشوفهم تاني في فيلم جديد مع بعض.
تامر حسني ودُرة
فيلم تصبح على خير كان في توليفة كده بين مجموعة من الفنانين اللي ماتتخيلش إنك تشوفهم مع بعض، بس لما تتفرج عليهم تلاقي الطاقة حلوة جدًا! ومن ضمنهم تامر حسني ودُرة اللي شوفناهم في إطار كوميدي خفيف، ومن وقتها وإحنا عايزين نشوفلهم أفلام تانية مع بعض!
محمد سعد ونور
مع إن محمد سعد ونور مش الكابل المثالي اللي ممكن تكون شايفه في خيالك، بس أكيد لما شوفتهم في فيلم عوكل غيرت رأيك.. مش كده؟