مصر هتستضيف على أرضها السنة الجاية بطولة العالم لكرة اليد رجال في نسختها ال27، والبطولة هتكون من 13 يناير ل31 يناير 2021. ودي هتكون تالت مرة تستضيف إفريقيا البطولة، وتاني مرة تستضيفها مصر، فأول مرة كانت في 1999 وفازت السويد باللقب. والنسخة دي من البطولة هتكون أول كأس عالم للرجال في كرة السلة برة أوروبا من 2015، وأول نسخة بتضم 32 فريق بدل 24.
حفلة قرعة البطولة هتكون يوم السبت الجاي 5 سبتمبر 2020 عند أهرامات الجيزة، أكتر مكان جاذب للسياحة في مصر، ومقدمين الحفلة هيكونوا إنجي المقدم، وجاسمين طه، ونجوم تانيين هيحضروا زي خالد النبوي، ونسمة محجوب للترويج للمناسبة.
والمفاجأة الحلوة في الحفلة دي هي أن الموسيقار الكبير عمر خيرت هيحيي الحفلة بألحانه الجميلة والممتعة، والقرار ده اتاخد بعد ترشيحه لإحياء الحفلة واتفاق الآراء عليه.
وأعلنت اللجنة المنظمة للبطولة أنها هتكون فرصة علشان نوري العالم أننا قادرين على تنظيم حدث ضخم ومسئولية زي دي، وأنهم جهزوا إجراءات وتدبيرات احترازية للوقاية من فيروس الكورونا زي ارتداء الكمامات، وتعقيم اليد، وقياس الحرارة، وأنهم لسة بيرتبوا نسبة حضور الجمهور اللي ممكن تكون بنسبة 1 إلى 2، يعني هيكون في كرسي فاضي مابين كل كرسيين. وأعلنوا عن الصالات اللي هتدور فيها المباريات، وهما صالة استاد القاهرة، وصالة العاصمة الإدارية الجديدة، وصالة 6 اكتوبر، وصالة برج العرب.
هيحضر الحفلة دي ممثلي ورؤساء الدول المشاركة من ال5 قارات، وهما 31 دولة زائد مصر المستضيفة. والدخول هيبدأ من الساعة 6 بالليل، والحفلة هتبدأ الساعة 7 بالليل، مع فقرات فنية، وكلمات من المنظمين، والرؤساء، وهيتم الإعلان عن التميمة الخاصة بالبطولة اللي اتعملت برة البلد، وإعلان القرعة في نهاية الحفلة. وهيحضر الحفلة لجنة تفتيش دولية، وهيتم التفتيش على اجراءات الإقامة لل 32 منتخب المشارك في المونديال.
المنتخب المصري لكرة اليد اللي احنا فخورين بيه، وعلى طول رافع راسنا، يتمرن حاليًا في معسكرات التدريب مع واحد من أحسن المدربين في العالم، الأسباني روبرتو جارسيا. والبطولة دي هتمثل تحدي جديد ليه بعد ما فاز ببطولات كتيرة في أفريقيا على مدار السنين، وهو بيعتبر من أحسن المنتخبات في أقريقيا بجانب المغرب، والجزائر، وتونس، اللي بنتمنالهم كلهم منافسة قوية ونتائج مشرفة.
