قصر عائشة فهمي واحد من أشهر الخروجات في القاهرة النهارده، ومع أي زيارة للقصر هتشوف عشرات من الناس اللي بتتصور في أرجاء القصر، بسبب معماره الخارجي الجميل، ومعماره الداخلي المتميز.
القصر اللي يعتبر واحد من التحف المعمارية التاريخية في القاهرة موجود على ضفاف النيل في منطقة الزمالك في شارع عزيز أباظة، قدام كوبري أبو العلا، ومن الناحية التانية تقدر توصل له من خلال شارع يوليو عند نزلة كوبري 15 مايو، قدام فندق ماريوت.
مافيش تذكرة دخول للقصر، وبيقول عم سيد الحارس اللي بيشوف البطاقة وأنت داخل، إن مافيش رسوم على زيارة القصر لإن شعار وزارة الثقافة “الفن للجميع”، وعلشان كده مش بتفرض أي رسوم على الزائرين اللي عايزين يتعرفوا على التحفة المعمارية ومحتوياتها الفنية.
بيفتح القصر للزوار من الساعة 9 الصبح لحد الساعة 9 بالليل كل يوم ما عدا يوم الجمعة، لكن ننصحك تعمل بحث بسيط على جوجل قبل ما تروح، لإن القصر أحيانًا بيقفل لأيام بسبب التصليحات والترميمات اللي بتحصل فيه من وقت للتاني.
تاريخ قصر عائشة فهمي
اتبنى القصر سنة 1907 على الطراز الأوروبي، وصممه المهندس المعماري أنطونيو لاشاك، اللي يعتبر من أهم المعماريين الإيطاليين في أواخر القرن الـ19، بالإضافة لقصر عائشة فهمي، صمم لاشاك قصور ملكية تانية في مصر؛ منها قصر الزعفران وقصر الطاهرة وقصر الأميرة فاطمة في الإسكندرية، وكان لاشاك اللي عاش وقت طويل في منصب، اترقى لمنصب كبير المهندسين وبعدها مدير القصور الخديوية.
اللي أسس القصر هو علي بك فهمي، واحد من أغنى أغنياء مصر في القرن الـ 19، وبعد بناء القصر اتفنن في تصميمه فجاب أوضة نوم الملك الصربي ومجموعة تحف مختلفة من حول العالم، وعاش علي بك في القصر مع زوجته الفرنسية مارغريت ميللر، اللي قتلته بعد ما واجهها بخيانته، واتحولت لواحدة من أهم القضايا التاريخية اللي شغلت الشرق والغرب وقتها.
محاكمة ميللر على جريمة القتل انعقدت في لندن، واترافع عنها المحامي الإنجليزي السير مارشال مول، اللي اعتُبر في الوقت ده أذكى محامي في العالم، استغل مول سمعة الشرقيين السيئة في أوروبا وقتها، والنظرة الراديكالية لهم كشعوب متوحشة وسوقية، وقدر يقنع لجنة المحلفين إن الزوج كان وحش في جسد إنسان، وبالتالي أخدت موللر براءة في قضية قتل زوجها.
بعد البراءة، رجعت موللر مصر وطالبت بنصيبها في ميراث زوجها، لكن حكمت محكمة الاستئناف المختلطة إن مالهاش حق في الميراث بحكم القاعدة الشرعية القانونية في مصر بإن القاتل مالوش حق في ميراث المقتول.
القصر في ميراث عائشة فهمي
كان فهمي باشا متجوز منيرة هانم وخلف منها أربع بنات؛ هما فاطمة وعائشة وعزيزة وزينب، وولد واحد اسمه علي. وبعد موت علي، اتقسم ميراث القصر على أخته عائشة وأخته عزيزة، ولكن اشترت عائشة نصيب أختها وبقى القصر ملكها وباسمها، ولحد النهارده معروف باسمها لوحدها.
اتجوزت عائشة تلات مرات، منهم مرة من الفنان المصري ورائد المسرح يوسف بك وهبي، ولكن ماستمرش الجواز كتير، ويقال إن سبب الخلاف ما بينهم كان أول فيلم ناطق في السينما المصرية، واللي استلهم وهبي قصته من قضية مقتل نسيبة علي بك فهمي، وهو فيلم (أولاد ذوات).
القصر كمجمع فنون
القصر اللي معظمنا بيروحه النهارده علشان يتصور فيه وخلاص، هو كمان مجمع فنون بتستخدمه وزارة الثقافة كمركز لإقامة الفعاليات الفنية، من معارض لوحات وأعمال فنية مختلفة ومكان عرض أفلام متنوعة من مختلف أنحاء العالم.
في أواخر شهر أبريل من سنة 2021، أقامت وزارة الثقافة معرض لمنحوتات الفنان المصري المُبدع آدم حنين في أروقة القصر، وقال الفنان إيهاب اللبان مدير القصر، عن المعرض: “يشكل بانوراما شاملة عن تجربة ثرية للنحات الراحل آدم حنين الذي يعُد امتدادًا حقيقيًا للفن المصري القديم”.
وخلال شهر أكتوبر من سنة 2021، نظمت وزارة الثقافة معرض فني لأعمال الفنانة المصرية التشكيلية جاذبية سري، وقام المعرض على عرض لوحات من أعمالها الفنية زاد عهددها عن الـ 90 لوحة.
وأكد الفنان إيهاب اللبان، مدير مجمع الفنون ومعد المعرض، إن المعرض جيه في إطار إحياء الذكرى السنوية الأولى على رحيل الفنانة الكبيرة جاذبية سري؛ “تقديرًا لمسيرتها الفنية الجديرة بالاهتمام والتكريم كأحد أهم رموز الفن المصري الحديث”.
تقدر تتابع الفعاليات الفنية اللي بتحصل في القصر (مجمع الفنون) من خلال صفحتهم على الفيسبوك، وتنزل تشارك في الفعاليات دي وتتعرف على فنانين مصريين عظماء، وفنانين عالميين بيتم الاحتفال بأعمالهم الفنية في القصر.