فيديو صعب انتشر بشكل كبير في الساعات اللي فاتت، لحالة من الفوضى والصراخ والانهيار من أولياء أمور وأهالي في مدرسة عمر مكرم في الأسكندرية، واتقال إن اللي حصل ده بسبب فقدان الأطفال بعد ما المدرسة خرجتهم قبل ميعادهم المحدد، الأطفال من الصفوف الأولى ومتوسط عمرهم 6 سنين، ولما أهاليهم راحوا بشكل طبيعي في الميعاد علشان ياخدوهم اتفاجئوا بعدم وجودهم. الفيديو انتشر في كل مكان في وسط حديث الناس عن اللي حصل في أول يوم دراسة.
وكيل أول وزارة التربية والتعليم في الأسكندرية أحال المتسببين في الواقعة للشئون القانونية للتحقيق في واقعة بسبب إهمالهم، وأضاف وكيل الوزارة في تصريحات للمصري اليوم: «المشكلة تكمن في دخول أولياء الأمور والأهالي المدرسة من أجل جلوس أبنائهم في الصفوف الأولى وتم السماح لهم بدخول المدرسة وحدثت حالة من الهرج والمرج بين الأهالي» .
وإن اللي حصل ده بسبب تزامن خروج الأطفال قبل موعدهم لأن المدرسة فترتين وهو ده اللي اتسبب في حالة الهرج والمرج بين خروج الأطفال قبل موعدهم ودخول أولياء أمور الفترة الثانية لاختيار الصفوف الأولى لأبنائهم.
نادية فتحي، وكيل المديرية قالت إن الأمن هو اللي مسئول عن الواقعة كونه هو اللي قام بفتح البوابة لأولياء الأمور، خصوصًا إنه ممنوع دخول الأهالي للمدارس من الداخل، قالت كمان إن الفيديو الذي جرى مشاركته بين المواطنين ومستخدمي مواقع التواصل الاجتماعي بشكل مغاير تماما لحقيقته، مضيفة أن ما حدث هو صراع بين أولياء الأمور لطلاب المدرسة حول حجز المقاعد الأولى للصفوف الدراسية المختلفة داخل المدرسة حسب تصريحتها لجريدة الأهرام.