في مرحلة الاستعداد والتحضيرات لاستقبال تقديمات الافلام اللي هتتعرض في مهرجان القاهرة السينمائي الدولي، في دورته الـ 44، قال الفنان حسين فهمي، رئيس مهرجان القاهرة السينمائي، إن المهرجان بيحاول أكبر عدد ممكن من الأعمال المتنوعة واللي بتضمن أفكار وثقافات واتجاهات سينمائية مختلفة عن طريق فتح باب المشاركة أمام التجارب الجديدة والملهمة من كل دول العالم.
وقال المخرج أمير رمسيس، مدير المهرجان، إن العمل على برنامج الدورة الحالية بدأ بالتعاون مع الفريق المميز للمهرجان واللي أحرز نجاح ملحوظ في الدورات الماضية وعلى رأسهم مدير المكتب الفني الناقد أندرو محسن، والناقد أسامة عبد الفتاح، مدير برنامج أسبوع النقاد، وتم تكليف المخرج الشاب يوسف هشام، بإدارة برنامج الأفلام القصيرة بالإضافة إلى متابعته العمل على أفلام الأمريكتين، والناقدة رشا حسني للبرنامج الآسيوي، والمخرجة ماجي مرجان لسينما شرق أوروبا.
وأكد “رمسيس” إن التواجد القوي للسينما المصرية القصيرة والتسجيلية والروائية الطويلة في مهرجان القاهرة، ممكن يكون مؤشر على إن السنة دي بتشهد صحوة للفيلم المصري، وهي صحوة اللي وصفها بإنها جديرة بالفخر.
هتبدأ فعاليات الدورة الـ44 لمهرجان القاهرة السينمائي الدولي يوم 13 نوفمبر القادم وهتستمر لحد 22 من نوفمبر، وأعلن مهرجان القاهرة السينمائي الدولي من خلال صفحته على الإنستجرام عن الأفلام المصرية اللي هتتعرض ضمن قائمة الأفلام القصيرة ومسابقة آفاق السينما العربية.
فيلم صاحبتي (17 دقيقة)
فيلم قصير من إخراج كوثر يونس، وهيكون عرضه في المهرجان هو الأول في الشرق الأوسط وشمال أفريقيا.
خلال أحداث الفيلم، بيوافق “علي” على فكرة حبيبته اللي بتحط علاقتهم في اختبار، وبعدها بتخرج الأمور عن المسار المتوقع لما يحصل تشوش في أدوار الجنسين.
قال أمير رمسيس إن فيلم “صاحبتي” بيتم عرضه للمرة التانية، نظرًا لتحوله لحدث عالمي السنة دي بعد ما شارك في مهرجان فينيسيا.
فيلم ماما (20 دقيقة)
من إخراج ناجي إسماعيل، وهو فيلم روائي قصير بيتعرض لأول مرة عالميًا في فعاليات المهرجان، وبتشارك في بطولته الفنانة مي الغيطي.
بتدور أحداث الفيلم حول قصة بنت عندها 21 سنة، مخبية سر خطير علشان تحمي نفسها وأخوها.
فيلم من عمل الشيطان (21 دقيقة)
إخراج ديسيل مختجيان، وهو فيلم روائي قصير بيعرض لأول مرة عالميًا ضمن فعاليات المهرجان.
بتدور أحداث الفيلم عن بنت بترجع للقاهرة بعد عشر سنين، علشان تنظم معرض عن المصورين الأرمينيين الرائدين اللي سجلوا التاريخ المصري عبر الزمن، وخلال التحضيرات، بتكتشف السبب الحقيقي اللي دفعها للرجوع، بعد ما تكشف لها الظروف عن حاجات ماكانتش واخدة بالها منها.
فيلم المقابلة (15 دقيقة)
من إخراج هند، بيتعرض لأول مرة عالميًا، وبيشارك في بطولته الفنانة سارة عبد الرحمن.
خلال أحداث الفيلم، بتضطر “نادية” إنها تختار بين رعاية أمها اللي عندها أفكار انتحارية، وبين حضور مقابلة عمل ممكن تغير حياتها وحياة عيلتها للأفضل.
فيلم بعيدًا عن النيل (99 دقيقة)
من إخراج شريف القشطة، وثائقي من إنتاج مصر – الولايات المتحدة وبيتعرض عالميًا لأول مرة، وقرر القائمين على إدارة المهرجان عرضه كافتتاح لمسابقة آفاق السينما العربية السنة دي.
بتدور أحداث الفيلم حول فرقة موسيقية أعضائها من مختلف الدول الأفريقية، وبنتابع خلال أحداث الفيلم جولة الفرقة في الولايات المتحدة الأمريكية.
فيلم The Swimmers
من إنتاج شركة “Working Title” لأول مرة في الشرق الأوسط وشمال أفريقيا، ضمن فعاليات الدورة المنتظرة الشهر القادم.
بتدور أحداث الفيلم عن بنتين سوريتين أخوات، بيهربوا من بيتهم اللي انهار في الحرب في دمشق، وبيسبحوا لساعات في البحر الأبيض المتوسط، علشان يوصلوا لليونان كطالبات لجوء، قبل ما يروحوا للمناسبة في دورة الألعاب الأولمبية في ريو دي جينيرو.
فيلم 19 باب
الفيلم بيتعرض لأول مرة عالميًا، وهو من كتابة وإخراج أحمد عبد الله السيد، وإنتاج فيلم كلينك، وبطولة سيد رجب، وأحمد خالد صالح، وناهد السباعي، وفدوى عابد.
تتبع أحداث الفيلم قصة حارس عقار عايش لوحده وشبه منعزل في الفيلا المهجورة اللي بيحرسها، لكن بعد ما يضطر يدخل في مواجهة مع شخص عايش في الشارع اللي جنبه، بيضطر يغير نمط حياته بالكامل.