بعد إعلان غينيا الاستوائية أول تفشي لفيروس ماربورغ الفتاك، ووفاة 9 أشخاص على الأقل، بدأت السلطات المصرية تحركاتها لمواجهة تفشي المرض.
صدر عن وزارة الصحة المصرية دليل تم توزيعه على المستشفيات والجهات الصحية في البلاد، في إطار خطة الاستعداد المبكر لأي أحداث صحية غير عادية، وفي مجموعة إجراءات وقائية هيتم تطبيقها خلال الفترة القادمة، بالإضافة للإجراءات اللي هيتم اتباعها في حالة الاشتباه بإصابة أي حالة.
شدد مصدر من وزارة الصحة المصرية إن مصر مافيهاش أي مصابين بالفيروس، وأكد إن الإجراءات اللي تم اتخاذها معتادة في الظروف اللي زي دي، بالذات بعد ما أعلنت منظمة الصحة العالمية عن انتشار الفيروس وارتفاع درجة خطورته.
امتى وفين ظهر فيروس ماربورخ لأول مرة؟
بدأ الاستنفار العالمي بعد ما أكدت غينيا الاستوائية 9 وفيات بفيروس ماربورغ شديد العدوى، وبتشتغل الجهات الصحية في الوقت الحالي على فحص 16 حالة مشتبه فيها.
وأعلنت منظمة الصحة العالمية عن أول وباء للمرض في البلاد دي على الإطلاق، بعد ما أكدت المختبرات الطبية في السنغال عن إيجابية نتائج فحص العينات.
وغينيا الاستوائية هي الدولة التالتة في غرب إفريقيا اللي تبلغ عن تفشي الفيروس خلال تلات سنين، بعد اكتشافه في غينيا سنة 2021، قبل ما ينتشر بشكل أكبر في غانا السنة اللي فاتت، وكان اتفشى المرض قبل كده في أنغولا سنة 2004 واتسبب في مقتل 90% من 252 شخص اتصابوا به.
أول مرة يتوصف الفيروس في الكتب الطبية كانت سنة 1967 بعد اكتشاف تفشيه بشكل كبير في مدينتي ماربورغ وفرانكفورت الألمانيتين، والعاصمة الصربية بلغراد.
ومن وقتها لحد النهارده، اتبلغ عن تفشي المرض في كينيا وجنوب إفريقيا وأوغندا وزيمبابوي، واتوفى شخص واحد في أوروبا بسبب المرض خلال الـ 40 سنة اللي فاتت.
أعراض الإصابة بفيروس ماربورخ
ينتمي فيروس ماربورخ لنفس العيلة زي فيروس الإيبولا، وهي عيلة (Filoviridae) ولكن يعتبروا كمان فيروسات مختلفة جدًا، وبيسبب الفيروس حمى نزفية، عند الإنسان مع نسبة وفيات عالية ممكن توصل لـ 88% في المية في الأنواع الأخطر.
من أعراض الفيروس الحمى الشديدة وصداع شديد وآلام في العضلات والشعور بالضيق والآلام، بعد يومين لتلات أيام، ممكن يحس المصاب بآلام في البطن وتشنجات وقيء وإسهال شديد، الأعراض دايمًا بتيجي ومعاها خمول شديد.
بين اليوم الخامس والسابع بعد الإصابة بالعدوى بيصاب عدد كبير من المرضى بأعراض نزفية حادة، وعلى حسب منظمة الصحة العالمية، بتعاني الحالات اللي بتموت من نزيف بيسبب فقدان الدم الشديد والصدمة لحد ما يوصل للوفاة بعد 8 لـ 9 أيام من ظهور الأعراض، أما فترة حضانة المرض فبتتراوح ما بين 2 لـ 21 يوم.
ازاي بينتقل الفيروس؟
الفيروس مش بينتقل عن طريق الهواء، ولكن بينتشر بالانتقال من شخص للتاني بشكل مباشر عن طريق اللمس أو الاتصال مع السوائل المصابة الموجودة على الأجسام الصلبة.
وبتشير منظمة الصحة العالمية إلى إن “الانتقال عن طريق معدات الحقن الملوثة أو من خلال إصابات وخز الإبر يرتبط بمرض أكثر خطورة وتدهور سريع وربما معدل وفيات أعلى”.
العلاج والوقاية من المرض
لازم ناخد الخطوات اللي هتساعدنا في السيطرة على انتقال العدوى من شخص للتاني، ولازم نتجنب نتعامل مع أي شخص مصاب، ونتجنب الاقتراب من المناجم أو الكهوف اللي بتعيش فيها خفافيش الفاكهة.
أما بخصوص العلاج، فوضحت منظمة الصحة العالمية إن مافيش لقاح أو دواء لعلاج فيروس ماربورخ الفتاك لحد النهارده، والأدوية اللي بيتم وصفها للمرضى هي للسيطرة على الأعراض وتحسين حالتهم.