العالم بيحتفل يوم 8 سبتمبر باليوم الدولي لمحو الأمية، اللي بقت حاجة أساسية في الوقت اللي بنعيش فيه، إن كل إنسان يكون بيعرف يقرأ ويكتب وكمان يحسب عمليات حسابية بسيطة. ضرورة مش رفاهية لكن في ظروف كتير بتقف بينها وبين عدد كبير من الناس، وعلشان المجهود المبذول بطرق مختلفة لمحاربة الجهل والأمية بيختلف من قرارات حكومية لمساعدات الأفراد بينهم وبين بعض، في قرارات حكومية هتساعد بشكل كبير في محو الأمية عن ناس كتير في وقت قليل، وكمان بمساعدة طلبة الجامعات، علشان في نفس الوقت نحس بمسئولية اجتماعية تجاه بعض، تعالوا نشوف إيه القرارات دي.
لبعض الكليات، تم إصدار قرار من المجلس الأعلى للجامعات، بإن يكون محو أمية عدد معين من الأفراد، شرط للتخرج من الكلية، والكليات دي هي: كلية التربية، والتربية النوعية، والطفولة المبكرة، والتربية الرياضية، والدراسات العليا للتربية، لمحو أمية عدد من الأفراد، غير محدد بشكل عام، قرار تحديد العدد متروك لمجلس الجامعة، وكمان ممكن المجلس يضيف كليات تانية للقرار، وده على حسب اللي هتشوفه كل جامعة وفق ظروفها.
في البداية، طلبة الجامعات شافت القرار ده بشكل سلبي، وإنه هيعمل قيود تقف بينهم وبين تخرجهم من الجامعة، واتكلموا عن صعوبة الظروف والحيثيات المختلفة اللي هتترتب على تنفيذ القرار ده، من صعوبة الوصول لأميين عايزين يتعلموا، وبشكل آمن يضمن للطلبة أمان شخصي في عملية تعليمهم، طبعًا في ظل ظروف بنعيشها في المجتمع بنسمع عنها كل يوم من حوادث مختلفة، الطلبة خايفين يتعرضوا لها وهما مضطرين يتعاملوا مع أشخاص مجهولين في خلال تنفيذهم لعملية محو الأمية. أما التلميذ اللي هيتم تعليمه، لو نجح بيحصل على شهادة من الدولة بمحو الأمية.
لكن بشكل تاني، لو فكرنا في الموضوع بشكل إيجابي، مفيش حد فينا مايعرفش شخص غير متعلم حتى لو من بعيد، في كل مكان، في محيط السكن أو الشغل أو حتى عن طريق أصحابنا ومعارفنا، زيّ posts بنشوفها كل يوم عن أشخاص بيسألوا لو حد عايز يساعد في محو أمية أشخاص يعرفهم، وبنلاقي حاليًا الطلبة نفسهم بيبادروا بالمساعدة، لإنها مصلحة مشتركة بين الطرفين، وده الجانب الإيجابي من القرار.
وبعد القرار ده، تم إصدار قرار كمان بيحقق مصلحة مشتركة بشكل أكبر على الناحية المادية، قرار جامعة القاهرة بتخفيض المصروفات الدراسية للطلاب بنسبة 25% للطلاب اللي هينجحوا في محو أمية 10 أفراد، وده هيشجع طلاب كتير إنهم يقبلوا على المبادرة دي لإنها هتشيل عنهم عبء اقتصادي.