وأنت بتفتش في ذكرياتك مع الأفلام والمسلسلات، هتكتشف أن فيه شخصيات بعينها بعد مدة من الزمن مش قادر تتفرج عليها تاني ولا تقرب لها، ولو جت في العمل بتجري مشاهدها، وده لإنها شخصيات كانت سيئة بشكل من الأشكال ومش الشر اللذيذ اللي ممكن يعدي لأ ده الشر اللي ممكن يقلب معانا بعقد نفسية ومجموعة من الترومات الصغيرة.
مصطفى أبو حجر – حب البنات
“أنتي قولتيلي أن كلهم مصطفى أبو حجر” ، برغم حبنا لفيلم حب البنات وشخصياته اللي بتشبه كل حد فينا أو بتمثل جزء بسيط منها، بس كان فيه شخصية خفية عمرها ما ظهرت في الفيلم، بس يكفي لما كان بيتذكر اسم “مصطفى أبو حجر” في الفيلم بناته كانوا بيتحولوا، لإنه ببساطة ربى لهم عقدة صغيرة جوا كل واحدة فيهم، في كل مرة كان بيسيب أمهاتهم علشان يروح لغيرها، وكبروا على مشاكل نفسية انعكست بشكل مختلف على تصرفاتهم بس النتيجة كانت واحدة وهي الخوف من الارتباط.
عزيز- حافية على جسر الذهب
“أنا مش إنسان .. أنا عزيز” .. “يا قطة”، “أهلا يا قطة الكلاب صوتها علي اليومين دول بتهوهو كثير”، جمل بمجرد سماعها بصوت عزيز تجبلك تروما، عزيز الشخصية اللي قدمها عادل أدهم في حافية على جسر الذهب، كانت جامعة كوكتيل من كل الصفات السيئة اللي قلبك يحبها، راجل استغلالي وانتهازي فاكر نفسه فوق القانون، يقدر بسهولة يأذي أي حد بإشارة منه، وكانت ميرفت أمين وحسين فهمي هما ضحاياه، قدر ببساطة يفرق بينهم وبين حبهم ويتسبب لحسين فهمي في إعاقة ويهدد التانية ويحرق لها فستان فرحها ويساومها على حياة حبيبها.
خالد- سارة
لو كنت شوفته في شخصية “رياض” في الحقيقة والسراب ماكونتش هتصدق أن الشخص الطيب الغلبان اللي لسه لحد دلوقتي بيعيطنا لما يجي مشهد موته، هو نفس الشخص اللي مثل دور “خالد” في مسلسل سارة، خالد اللي حاول بكل الطرق أنه يبعد سارة أخته المريضة عن المستشفى وعن حسن علشان يستولى على ميراثها ويسطر عليها، وكله كوم وفي مشهد النهاية لما تصرفاته اتسببت إنها ترجع في غيبوبتها تاني وتتوحد في عالمها الخاص.. ولحد دلوقتي مش عارفين حصل لها إيه، وبنحسبن على الأخ الشرير.
الكتعة – العفاريت
هو الفيلم من أوله لآخره كان مرعب، من أول فكرة خطف الأطفال من وهما في اللفة واستخدامهم واستغلالهم في أعمال غير قانوية زي السرقة والشحاتة والتسول وتهريب الهروين، بس دور الكتعة اللي قدمته نعيمة الصغير زود جرعة شر العصابة، بالجلابية والشيشة اللي ماكنتش بتفارقها ونظراتها المرعبة وحنجرتها الغليظة وتفنينها في تعذيب الأطفال، أو وهي بتحاول تخلي الناس تدمن علشان يفضلوا تحت سيطرتها، كل ده كان كومبو شر بسببه لما كبرنا بنتجب الفرجة على الفيلم.
رئيسة عصابة التهريب – ضربة شمس
جميلة الجميلات وفيرجينا السينما المصرية بعيونها الساحرة، ولكن كل ده اتحول بقدرة قادر لطاقة رعب، نظراتها ظهورها واختفائها المفاجيء ومطاردتها لنورا ونور الشريف في فيلم ضربة شمس واللي زود الموضوع ستايل لبسها منديل حولين الرقبة والجوانتي، وكل ده وهي مانتطقتش بكلمة ولا حرف طول الفيلم برغم أنها هي زعيمة العصابة، ده غير إنها كانت بتقتل بكل هدوء بمسدس صغير في شنطتها أي حد يقف في طريقها بيبقى جثة في ثواني، حتى مانعرفلهاش اسم في الفيلم غير انها “رئيسة عصابة التهريب”
آخر كلمة: ماتفوتوش قراءة: حالة وفكرة خاصة: أعمال درامية بتقدم مواضيع مختلفة