مع موضة استخدام الشمع دلوقتي بطريقة تزيين لديكور وكمان بروائح مختلفة كمعطر، بتدي جو مختلف للمكان بالإضاءة والريحة المميزة، الشمع ممكن نستخدمه في حاجات تانية كتير مفيدة بكذا طريقة في البيت، للتجميل والتنضيف وكمان حيل بتنقذ الهدوم وحاجات تانية كتير، ممكن تنقذنا في مواقف باستخدام بسيط وسهل. تعالوا نتعرف أكتر على استخدامات للشمع بسيطة ممكن تنقذ حاجة من إننا نرميها.
ماسك علاج جفاف الإيدين
كعلاج للجفاف والتقشير اللي إيدينا بتتعرضله أوقات كتير لأسباب مختلفة زيّ التعرض للمياه فترة كبيرة أو البرد والحرارة، الشمع له فعالية في تنعيم الإيدين، وبطريقة سهلة، هندوب الشمع ولما يبرد ويوصل لدرجة حرارة الجلد يستحملها، هننزل إيدينا فيه، وبعد كده هنطلعها ونلبس جوانتي بلاستيك، وفوقه جوانتي قماش، وهنسيبها من حوالي ربع ساعة، وبعدها نفكها ونفرك الشمع بالراحة، هنلاحظ فرق في النعومة، لكن هنحتاج نكرر الماسك ده أكتر من مرة علشان نحصل على أفضل النتائج. وممكن نستعمل الطريقة دي كمان للرجلين.
تصليح سوستة الهدوم
كتير بنتعرض للموقف ده، سوستة في الهدوم أو حتى الشنط بتعلق، ممكن نحل الموقف ببساطة وبسرعة باستخدام الشمع، هنجيب قطعة شمع نفركها على السوستة بخفة فوق وتحت، ونكرر لحد ما السوستة تتحرك.
تفادي الدموع عند تقطيع البصل
لو ولعنا شمعة جنبنا أثناء تقطيع البصل، هتساعد في تقليل الدموع، والوجع اللي بيسببه كمان، لإن الشمعة هتمتص معظم المواد اللي بتتسبب في دموع العين.
تليين الأدراج والأبواب الخشب
الأدراج والأبواب من كتر الاستخدام بييجي عليها وقت والخشب بيبقى خشن والمفصلات بتاعتها بتكون تقيلة وبتعمل صوت في الفتح والقفل، والخشب نفسه بيبقى صعب فتحه، ممكن نستخدم الشمع في تليين الأبواب والأدراج وكمان الشبابيك، بتمرير قطعة من الشمع عليها، هتبقى أسهل في الفتح والقفل بعدها.
سد الثقوب في الحيط
علشان نمنع دخول أي حشرات من الفتحات والثقوب اللي بتحصل في الحيطان في البيت، هنستخدم الشمع في سد الثقوب دي، هنسيح الشمع ونحطه على الثقوب دي وبمجرد ما ينشف هتكون اتسدت.
غطاء للأزايز
لو غطا الأزايز ضايع أو عايزين نعمل غطا لإزازة نخزن فيها حاجة، هنسيح شمع ونلفها حولين الإزارة بسيلوتيب لإن ده هيخلينا نفتح الغطا بسهولة بعد كده، وبعدها نحط الإزازة فوق الشمع السايح ونلفها، هيبقى عندنا عطا نقدر نحطه ونشيله بعد كل استعمال.