المنطقة الجغرافية اللي بنطلق عليها دلوقتي اسم “الوطن العربي” مر عليها أكتر من حضارة واحدة على مدار تاريخها الطويل، والحضارات دي كانت بتأثر على عادات وتقاليد أهله وقاطنيه والراحلين ليه بأشكال مختلفة، دول المنطقة فضلت إلى حد كبير مستقلة ثقافيًا وحضاريًا لمعظم تاريخها لحد من 1400 سنة تقريبًا لما كل ده إتغير.
على مر العصور كان في أجزاء مختلفة من المنطقة تحت حكم واحد زي أيام الدولة المقدونية والحكم الروماني، لكن نادرًا ما كنا بنلاقي ثقافة موحدة في كل الدول اللي بنطلق عليها دول العالم العربي دلوقتي. المنطقة دي بتحتوي على أكتر من 20 دولة، كل واحدة فيهم ليها إرثها الحضاري العريق إلا وإن الحضارة العربية تعتبر هي السائدة وده بسبب الفتوحات الإسلامية في فترة الخلفاء الراشدين، وترتب على ده إن دول المنطقة بقت بتجمعهم حاجات كتير مشتركة زي إن معظم سكان المنطقة بيتكلموا عربي -بس بلهجات مختلفة- وبيحتفلوا بأعياد دينية واحدة زي عيد الفطر وعيد الأضحى والمولد النبوي. ولكن على الرغم من انتشار الثقافة العربية لكن العالم العربي لسه موجود فيه مئات الأعراق المختلفة اللي كتير منها مازال محتفظ بهويته المستقلة، فقررنا نتكلم عن شوية منهم وإيه هي وعاداتهم وتقاليدهم.
العرب موجودين بأكبر نسبة ديموغرافية في العالم العربي، وبترجع أصولهم لمنطقة شبه الجزيرة العربية ولكن مع ظهور الإسلام وانتشاره بدأت القبائل العربية تتوسع بشكل كبير وسريع وده كان سبب مش بس في انتشار الإسلام ولكن برضه في تحرك العرب من موطنهم الأصلي لأماكن مختلفة من الدولة الإسلامية وانتشارهم. ومن الحاجات المشهورة اللي معروفة عن العرب من زمان هي ممارسة الشعر وبالتحديد شعر الغزل اللي كان منتشر في كل أنحاء شبه الجزيرة العربية، وده غير القهوة العربي اللي أهل دول الخليج دايمًا بيقدموها بجانب الفواكه المجففة زي التمر والتين، ودايمًا بيعتمدوا علي استخدام البهارات والتوابل في أكلهم.
أما المصريين فموجودين بشكل كبير في الوطن العربي، وبيتركز معظمهم في مصر والبعض منهم موجود في دول الخليج للعمل. بعد انضمام مصر للدولة الإسلامية أصبحت اللغة العربية هي اللغة الرسمية للبلد ولكن بلهجات مختلفة فكل محافظة من محافظات مصر ليها لهجتها الخاصة بيها. ولأن المصريين كانوا دايمًا جزء مهم من الدول الإسلامية المختلفة فالاحتفالات بالأعياد الدينية شئ مهم عند المصريين زي تبادل العيدية وأكل الكحك في عيد الفطر ودي كلها احتفالات مشتركة بين الوطن العربي، ولكن المصريين -سواء مسلمين أو مسيحيين- مازالوا بيحتفلوا ببعض الأعياد اللي كان الفراعنة بيحتفلوا بيها زي شم النسيم اللي بيرجع الاحتفال به لسنة 2700 قبل الميلاد. ومن أشهر الأكلات المصرية الكشري والفول المدمس والملوخية. ومن أهم المجموعات الديموغرافية المصرية مجموعة الأقباط اللي منتشرين بشكل أكبر في مصر وشمال أفريقيا عن باقي الوطن العربي، هما موجودين في مصر بنسب تتراوح ما بين 5٪ و20٪ وفي ليبيا بنسبة 1٪، وبيعتبر الأقباط من أكبر التجمعات المسيحية في العالم العربي. أصل كلمة الأقباط مشتقة من الأسم اللاتيني لمصر ”إجبتوس“ وعلي مر التاريخ كان الأقباط بيتكلموا اللغة القبطية حتي بعد انتشار اللغة العربية، وبترجع اللغة القبطية للقرن الثاني قبل الميلاد وكانت ببتعتبر أخر شكل للغة المصرية القديمة وفضل الأقباط يستخدموا اللغة دي لحد القرن الـ 17 بعد الميلاد. ولما دخلت المسيحية مصر بدأ الأقباط ببناء الكنائس على أسس العمارة القبطية اللي بتعتمد بشكل كبير علي العمارة المصرية القديمة زي الكنيسة المعلقة.
ومن العرقيات المهمة في الوطن العربي: هي عرقية الفرس، اللي الموجودين في الوطن العربي لكنهم بيتركزوا في دولة إيران، وبالرغم من إنهم بيستخدموا حروف اللغة العربية إلا وأن لغتهم هي اللغة الفارسية وبتختلف تمامًا عن العربي اللي بيعتبر من اللغات السامية ولكن الفارسي بيرجع أصلها لشجرة عيلة اللغات الهندي أوروبية؛ فبيرجع أصل اللغة الفارسية للقرن السابع قبل الميلاد في وقت تأسيس الدولة الأخمينية واللي توسعت زي ممالك كتير عبر التاريخ وليها آثار في مصر وليبيا وشمال شبه الجزيرة العربية. والفرس هما أول الناس اللي اكتشفوا أسرار مهنة الخياطة ومن أشهر أعمالهم السجاد الفارسي. أما بالنسبة لتقويمهم، فعكس العالم كله اللي بيتبع التقويم الميلادي ومعظم الوطن العربي اللي بيستخدم التقويم الهجري، الفرس بيتبعوا التقويم الإيراني اللي بيستخدموه بقالهم من أكتر من 2000 سنة، وبتبدأ السنة الإيرانية لما بتكون الشمس معتدلة على خط الاستواء مع بداية موسم الربيع.
الأتراك بيشكلوا نسبة مش صغيرة من ديموغرافية الوطن العربي، لكن معظمهم بيعيش حاليًا في تركيا وتركمانستان في آسيا، وبيتكلموا باللغة التركية، وبيرجع أصلهم لآسيا الوسطى، وانتقلوا لشرق أوروبا خلال القرن الأول قبل الميلاد، ومع التوسع والفتوحات الإسلامية اعتنقت معظم القبائل التركيا الإسلام، وأسسوا دول مختلفة زي دولة سلاجقة الترك. ومع حلول القرن التاسع أصبحت الدولة العثمانية -واحدة من أشهر وأكبر الممالك اللي أسسها الأتراك- هي مركز العالم الإسلامي وقدرت تفرض سيطرتها على معظم العالم العربي، وفضلت مستمرة لأكتر من 7 قرون. ومن أشهر الأكلات التركية هي البوريك اللي بيكون عجين مخبوز أو محمر بداخله جبنه أو لحمة.
الأكراد هما السكان الأصليين لمنطقة جبال زاغروس المعروفة بين الأكراد باسم ”كردستان الكبرى“ وبتقع في غرب آسيا، ولكن بسبب تقسيم الوطن العربي بعد الحرب العالمية الأولى بين إنجلترا وفرنسا أصبحت ”كردستان الكبرى“ مقسمة ما بين شمال غرب إيران وشمال شرق العراق وسوريا وجنوب شرق تركيا. وبيرجع أصل الأكراد للعرق الآري اللي كان ليهم حضارة عريقة بتمتد من إيران للهند. والأكراد بيتمتعوا بتراث غني بيحتوي على القصص والأغاني والأساطير ومن أكتر العناصر انتشارًا في التراث الكردي هو الثعلب اللي كان جزء مهم من الحكاوي الكردية.
البربر أو الأمازيغ بيعتبروا من السكان الأصليين لشمال أفريقيا وهما موجودين دلوقتي في الصحراء المصرية الغربية في واحة سيوة وليبيا والجزائر وتونس، معظمهم بيتكلموا اللغة الأمازيغية بالرغم من إنها مش موحدة ومتأثرة باللغة العربية، وبيوجد دلوقتي حوالي 32 مليون أمازيغي بيسكن في شمال أفرقيا. وبيقال إنه القائد الأمازيغي “شيشنق الأول” من ليبيا استطاع في حوالي سنة 1000 قبل الميلاد أنه يدخل مصر وأنه أسس أسر فرعونية أمازيغية وهما الأسرة الثانية والعشرين والأسرة الثالثة والعشرين.
