بواسطة: ساره علي
عُمر أبو كرامة بيركب خيل من سن 3 سنين، بيعشق الحصنة، كان عاوز يوصل للناس إحساس المتعة اللي بيحسها مع الخيل. وعلشان الناس تعيش تجربة حقيقية ممتعة، أسس عُمر أبو كرامة طلعة خيل. هي ركوب حر للخيل في صحراء سقارة. عُمر لما فكر في طلعة خيل كان عاوز يسهل للناس الفكرة ويشجعهم إنهم ياخدوا الخطوة دي, كمان كان عاوز الناس تفهم الحصان أكتر وتتعرف عليه مش مجرد طلعة وخلاص، لإن بالنسبة له إن أهم حاجة العلاقة ما بين الخيل والشخص اللي راكب.
عُمر بيقول إن الخيل بيأثر فيك بشكل إيجابي، بيخليك واثق من نفسك، قادر تتحكم في رد فعلك تجاه المواقف بشكل متزن، وكمان أكثر تحملاً للمسئولية وصبور. ده غير فوائد ركوب الخيل على صحة الجسم وتقوية العضلات.
إيه المختلف في طلعة خيل؟
عُمر كان عاوز ينقل فكرة الركوب الحر من نزلة السمان وإنك مجرد تاخد لفة بحصان لطلعة خيل حقيقية بتتعلم فيها ازاي ممكن تقدر تتعامل وتتواصل مع الحصان, تتعلم أساسيات ركوب الخيل. كمان المميز في طلعة خيل إن هيكون معاك كابتن أو إتنين عندهم خبرة علشان يساعدك ويعلمك صح. خلال الرحلة كلها الكابتن هيكون معاك هيعلمك ازاي تتصرف مع الحصان في كل حالاته، وتقود بشكل احترافي.
الطلعه بتكون ازاي؟
اليوم بدأ بإننا اتجمعنا في المزرعة، الناس كانت لطيفة جدًا, شربنا قهوة وبدأنا نلف نتفرج على الحصنة ونتصور معاهم. المزرعة فيها أنواع من الخيل كتير، هتتعرف على شوية منهم لحد ما الحصنة اللي هتتحرك بيها تجهز. قبل ما بتركب بيسألك الكابتن لو كانت دي أول مرة أو ركبت قبل كده علشان يقدر يختار لك الحصان الصح. وبعدها بيعرفك على أساسيات ركوب الخيل. وبتبدأ الرحلة من الجبل من بوابة أهرامات أبو صير. الرحلة عبارة عن ركوب حر للخيل وأكتر حاجه هتستمتع بيها لما الخيل يجري. لو دي أول مرة ليك ممكن تكون خايف شوية بس الكابتن بيكون موجود معاك وبيخليك تجرب. الجري بالخيل سهل جدًا وماتخافش مش هتقع.. كمان بياخدوا الخيل في آخر كل أسبوع الفيوم وبتكون الطلعة مميزة جدًا على البحيرة.
إيه اللي طلعة خيل عايزين يحققوه الفترة اللي جاية؟
طلعة خيل هدفهم إنهم يحببوا الناس في الخيل, وإنهم يوصلوا لأكبر عدد من الناس علشان يغيروا المفهوم الغلط لركوب الخيل للمفهوم الصح، وينشروا ثقافة التعامل مع الخيل. وده اللي فعلًا نجحوا فيه وبيسعوا أكتر علشان يتحقق. لازم تطلع طلعة خيل علشان أنت كمان تغير مفهومك عن الركوب الحر وتجرب الإحساس الممتع للركوب الحقيقي للخيل.