مش أول مرة، لكن دي اللي فتحت النار على الأفعال اللي زيّ دي، اللي تخلي صحيفة بكل سهولة تتخلى عن”أخلاق المهنة” أو حتى أبسط مفهوم للمهنية، علشان نزود تفاعل الناس و”تجيب ريتش” من كومنتات، حتى لو الكومنتات دي هتكون إهانة وشتيمة لشخص بسبب كلام هو حتى ماقالوش، أو قاله في سياق طبيعي وشخص قرر يقص الكلام لوحده علشان يدي معنى تاني.. مانشيتات بتصريحات غريبة على لسان مشاهير، بتقلب الدنيا عليهم وتخلي الجمهور يهاجمهم..
الموضة دي في الصحافة للأسف بقت أسلوب بتتبعه عدد من الصحف والقنوات خصوصًا على منصاتهم على مواقع التواصل الاجتماعي، لإنها على الأغلب بتستهدف جمهور ماشافش الحلقة أو الحوار كامل، فلما هنقص منه جملة -في غير سياقها- هتعدي قدام شخص فاتح موبايله وبيقلب على فيسبوك أو انستجرام، فالجملة تشد انتباهه ويتفاعل مع البوست.
أحدث واقعة كانت عن الفنانة شيرين رضا، بعد ما تم قص جزء من كلامها عن عمرو دياب، فبقى البوست بيهين الشخصين، وبما إنهم من أشهر الشخصيات العامة والفنانين فطبعًا الناس هتدخل تقرأ، لكن اللي يدور ويتحقق هيكتشف إن التصريح الحقيقي للفنانة كان بعيد عن السياق المقصود.
الموضوع ده مش جديد على الساحة، للأسف منتشر وبقاله سنين كمان، واتكرر مع مشاهير وفنانين كتير، فاكرين لما حصل “تريند” على الفنانة بسمة وتصريحاتها عن الأمومة؟
تصريحات انتشرت في كل مكان على لسان الفنانة بسمة، وبتقول إنها رفضت ترضع بنتها وإنها بترفض تقوم بدور “بقرة” في حياة حد، وإنها كمان بترفض إن البنت تنام جانبها. تصريحات خلت الجمهور يهاجم بسمة ويوصفها بالتجرّد من مشاعر الأمومة، ووصلت لإن البعض قال إنها ماتستاهلش تكون أم!
وبعد كل ده، اتضح إن تصريحات بسمة اتكتبت بطريقة غير السياق اللي اتقالت فيه تمامًا، بسمة كانت ضيفة في برنامج واتسألت عن الحاجات اللي الأمومة غيّرتها فيها، وقالت إنها كانت حاطة rules وماكانتش عايزة ترضع بنتها، وكانت عايزة تعوّدها على نظام نوم معين في مكان لوحدها، لكن بعد ما خلفت كل ده اتغير تمامًا في نظرها ورضعت بنتها سنتين وفضلت سنين تنيمها جنبها.
وقبلها، حصلت واقعة مشابهة مع الفنانة رانيا يوسف، وعادةً بيستغلوا تصريحاتها في غير سياقها علشان الريتش
التصريح ده كمان من وقت قريب أثار الجدل وانتشر بشكل كبير، وطبعًا متخيلين معظم الكومنتات كانت بتقول إيه، مع إن لو سمعت الكلام كامل في الحوار اللي اتقال فيه، مش هتحس بحاجة غريبة زيّ وأنت بتقرأ العنوان ده في الصحف، كلام عن فتى الأحلام أو مواصفات الزوج اللي بتتمناه، سؤال متعودين نسمعه في البرامج، وحتى للفنانين وبيتقال لهم إيه مواصفات الزوجة اللي بتحلم بيها، والإجابة المعتادة إنها تحترم ظروف شغله وطبيعته، وكذلك ردود الفنانات إن الزوج يتفهم طبيعة شغلهم. لكن قص جملة من سياق حوار علشان تبقى عنوان يشد الناس إنها تشتم في الفنان، هل هي دي الصحافة! ده طبعًا غير الأخبار اللي بتكون من أولها لآخرها غلط أو ماحصلتش..