“شوفت سكسوكة عمرو دياب على شريط الكاسيت الجديد؟” زي ما كان محقق نجاح وشهرة على مدار أكتر من 20 سنة وماقدرش حد ياخد مكانه في ستايل الأغاني، وخلق لنفسه مكانة خاصة ماحدش عرف يوصل لها، كمان عمل لنفسه ستايل في موضة فرضت نفسها واعتمدها شباب التسعينات وجيل الألفية وظهرت في كليباته وعلى بوستراته.
وبدأ الناس قبل عصر السوشيال ميديا يتكلموا عنها في قعداتهم “شوفت قصة عمرو دياب في كليبه الجديد؟” وتبدأ الجملة في الانتشار من هنا لهنا لحد ما يتم اعتمادها كخط أزياء وتلاقي نص الشباب لابساها تاني يوم، ومن هنا بقى هضبة للغناء وأسطورة للموضة وملك التقاليع الجديدة.
بلوفر “تملي معاك”
البلوفر الأشهر في تاريخ كليبات عمرو دياب وأي نجم من بعده، والوحيد العايش وبتشوفه في المسلسلات وبيتباع في المحلات باسم عمرو دياب، ظهر من 2000 ويعتبر من أشهر خطوط الموضة للهضبة في العالم العربي.
صناع الأعمال الفنية بيلجأوا له كدلالة على الفترة الزمنية وكإنه ماركة مسجلة زيه زي شرايط الكاسيت وسندوتشات ويمبي.
مع نجاح وشهرة البلوفر، فالأغنية كمان وصلت للعالمية واتغنت بلغات مختلفة وخدت مركز الأعلى مبيعًا على مستوى العالم في 2008.
سكسوكة “العالم الله”
قدم عمرو دياب “السكسوكة” للمرة الأولى في كليب “العالم الله”، والناس شبهتها وقتها بسكسوكة باتمان.
الأغنية دي بالذات كان لها قصة حكاها الفنان هشام عباس، بيقول إنه في الأصل عملها الملحن عمرو مصطفى لمجاملة صديقه الفنان الراحل عامر منيب في عقيقة بنته، وغناها هناك في الحفل ولما سمعها عمرو دياب بالصدفة قرر إنه يضمها لألبومه.
أيس كاب “أنا عايش”
نيجي لموضة الأيس كاب والأكمام الطويلة، والموضة دي بالتحديد طولت معانا شوية شوفناها لأول مرة في كليب “أنا عايش”، وبرغم إنه ظهر بيها في أكتر من كليب بعدها في 2007، منهم كليب “نقول ايه”، بس يفضل كليب “أنا عايش” له مذاقه الخاص وكتير من الموديلز الشباب اعتمدت الستايل ده.
التاتو
الهضبة عنده أكتر من وشم وتاتو وكل واحد منهم كان له معنى وقصة، بس أشهرهم تاتو عبد الله المرسوم على ذراعه، وده ظهر به في ألبوم “وياه” في 2009 وكان أول مناسبة يظهر بها عمرو دياب بتاتو في حياته، وعمل قلق وقتها.
سوالف “أيامنا”
أكتر من 25 سنة عدت على ألبوم “أيامنا” أغاني الألبوم كسرت الدنيا وكانت أغنيته “الهيت” هي أغنية “ما بلاش نتكلم فى الماضى” قلبت الشوارع هي وموضة السوالف المعتمدة على بوستر الألبوم، وكانت ظاهرة طويلة ورفيعة ومعاها الحزام المشغول بالمعدن، فكانوا عدوى لجيل كامل.
الجاكيت الجلد في “أيس كريم في جليم”
الفيلم كان كله ماركة مسجلة، من شارع 9 في المعادي، لأيس كريم وسط البلد، لمخزن شرايط الكاسيت، لأغنية رصيف نمرة خمسة، لحد جاكيت عمرو دياب الجلد، الجاكيت ده بالذات فضل عمرو محتفظ به وظهر بيها في ألبوم “عمرنا” وظهر به مؤخرًا في واحدة من صوره، والناس بسهولة اتعرفت عليه، يعني مش بس الشباب بيعتمدوا موضة الهضبة على مدار السنين، هو كمان بيكمل بيها مش مجرد مشهد والتاني.
قميص معدي الناس
ودي كانت أحدث موضة ظهر بيها الهضبة وعملت قلبان، في ألبوم “معدي الناس” في 2017، قميص منقوش بالورد، طاقة وحيوية اعتمدوه شباب الساحل كزي رسمي في الصيف لأكتر من سنة، مع اعتماد نفس فورمة الساحل، وده طبعًا قبل ما يظهر القميص الكتان على الشورت الأبيض ويكتسح الساحل. ونفس فكرة القميص المشجر كان اعتمده في أغنية “شوقنا”.
من السكسوكة للقميص والبلوفر وتسريحة وبندانة الشعر، اختيارات عمرو دياب ولو كانت بسيطة بتنتشر بسرعة البرق زي أغانيه بالظبط وكان بيحرص إنه يظهرها بشكل يخطف العين.