تحقيقات موسعة بدأتها النيابة العامة في شمال الجيزة، بسبب خناقة بين رجل أعمال سوداني وسيدة أمريكية على شقة في منطقة الدقي، النيابة طلبت تحريات الأجهزة الأمنية حول الواقعة وقررت استدعاء أطراف الخلاف لسماع أقوالهم.. طب إيه اللي وصل الموضوع لكده؟
الحكاية ببساطة أن الاتنين اكتشفوا أن كل واحد اشتري الشقة من صاحبها في نفس الوقت وبسعر مختلف، الطرف الأول هو “معتصم ” 56 سنة، رجل أعمال سوداني، والطرف الثاني “منى”، تحمل الجنسية الأمريكية؛ الطرف الأول اشترى الشقة بقيمة 13 مليون جنيه، ولما راح علشان يستلمها زي أي صاحب ملك، لقى السيدة الحاصلة على الجنسية الأمريكية مستأجرة الشقة لمدة 25 سنة.
وفي تفاصيل الأقوال الطرف الأول أكد أنه اشترى الشقة من سيدة تدعى “نيفين. ح”، بموجب توكيل بيع رسمي بـ13 مليون جنيه، وقالت السيدة الأمريكية إنها استأجرت الشقة من شخص تاني لمدة 25 سنة مقابل 21 مليون جنيه دفعت منهم 12 مليون جنيه في 7 يناير اللي فات، والتحقيقات مازالت مستمرة.
بمجرد ما تقرأ الخبر هتفتكر فيلم “غريب في بيتي” للعمالقة نور الشريف وسعاد حسني، الفيلم ده بنفتكره كل ما يحصل حادثة مشابهة للي حصل دلوقتي في قصتنا بس علشان مفيش أفلام تناولت الفكرة زي ما اتقدمت في الفيلم، لعيب كورة اسمه شحاتة أبو كف جاي من آخر الدنيا علشان يلعب كورة ويحقق حلمه في القاهرة، هينصب عليه شخص ويبيع له شقة وفي نفس الوقت هيبيعها لواحدة تانية اسمها عفاف عبد الواحد عايشة لوحدها هي وابنها.. بس ياترى القصة المرة دي هتنتهي على إيه؟
آخر كلمة: ماتفوتوش قراءة: النقوط والجمعيات.. حيل كل بيت عربي لتحقيق مبدأ التكافل الاجتماعي