الممثلة اللي علق معانا الإفيه المشهور بتاعها “مين فيكوا اللي أكل الجبنة” ودورها في مسلسل عايزة اتجوز، وغيرها من الأدوار المختلفة اللي عرفت تسيب فيها بصمتها، نادية العراقية رحلت عن عالمنا امبارح، متأثرة بإصابتها بفيروس كورونا، بعد معاناه مع المرض، اللي حرمنا من ناس كتير بنحبهم، وعلشان نفتكرها ونعرف عنها أكتر، رغم إنها ماكانتش بتظهر في لقاءات تليفزيونية كتير، مع إنها شاركت في حوالي 146 عمل فني، من مسلسلات وأفلام ومسرحيات وكمان أفلام كارتون، تعالوا نعرف أكتر عن نادية العراقية.
يمكن المعلومة اللي كانت مفاجأة، إنها مش مصرية، رغم لهجتها المصرية اللي اتقنتها، لكن نادية أصلها من العراق، وعلشان كده جه لقب “العراقية” في اسمها، لكن اسمها الحقيقي فاتن فتحي، اتولدت سنة 1963، واختارت اسم شهرة غير اسمها الحقيقي وقالت إنها اختارته لإن معظم الفنانين سواء عراقيين أو عرب بيختاروا أسماء فنية غير اسمائهم الحقيقية، وقالت كمان إنها بتتشرف إنه يكون اسمها الفني بينتمي لوطنها العراق.
من أشهر أدوارها دور “مدام سندس” في مسلسل عايزة اتجوز، وحكاياتها ونصايحها اللي كانت بتضحكنا، وكمان دورها في فيلم أبو علي، رغم إنه كان مشهد واحد، لكنها عرفت تسيب بصمة في الفيلم والناس لحد دلوقتي عارفين الإفيه المميز، نادية بدأت مسيرتها الفنية في المسرح والتليفزيون العراقي، وبعد كده انتقلت لمصر. وبسبب حبها لمصر، دخلت في نقاش حاد مع الفنانة الكويتية حياة الفهد، لما ردت بفيديو على تصريحات حياة الفهد اللي طالبت فيها بترحيل الأجانب عن الكويت وطردهم.