سعات كتير بسبب الأخبار السلبية المنتشرة على القنوات أو على السوشيال ميديا، بنحس بفقدان للأمل، وبنفتكر إن العالم كله مكان معدوم من التعاطف أو الرحمة، بس من كل وقت للتاني، بنسمع عن قصص إيجابية لناس بتضحي عشان غيرها، وبنفتكر إن بالرغم من كل السوداوية اللي بنشوفها، إلا إن فيه أمل وفيه خير أكتر من ما في شر.
أحمد الشاذلي، مدير عام بالإدارة التعليمية بالقليوبية، قرر يتبرع ببيته الجديد، اللي مبقالوش كتير متشطب، عشان يساعد أهل قريته المصابين بفيروس الكورونا المستجد. إبن قرية طنط التابعة لمدينة طوخ في القليوبية شاف إزاي أعداد الإصابة زادت بين أهل بلده، وإزاي المستشفى العام وصل لأقصى استيعاب، وبالتالي في ناس مبقتش لاقية مكان تعزل فيه نفسها.
الشاذلي قدم طلب لمحافظ القليوبية بيطلب فيه إنه يتبرع ببيته ويبقى مكان للعزل بسعة 30 سرير هيقدر يوفرهم لو اتوافق على الطلب، وكمان أضاف إنه هيتبرع بقيمة الأدوية وأي تجهيزات تانية.
وفي مقابلة مع اليوم السابع لما إتسأل عن ليه بيعمل كدا قال: “أنا عاوز أساعد أهلى ولازم الجميع يتكاتف من أجل عبور تلك الأزمات التى حلت بالعالم كله، وفى الشدائد تظهر معادن الرجال ومصر تمتلئ بأبنائها المخلصون”.