مع الحلقة التانية من مسلسل سره الباتع، انجذب الجمهور لقصة المسلسل، وعجبهم ترابط الأحداث، والتصوير السينمائي المميز، والإنتاج اللي طلع مشاهد ممتعة للنظر.
وقدمت الأحداث لحد دلوقتي مغامرة شيقة حفزت الناس على متابعة المسلسل، اللي نصحوا بالفرجة عليه بشدة.
بعض الناس شافوا إن أول حلقتين فيهم قفزات مونتاجية معروفة عن خالد يوسف، ولكن في المجمل اعتبروا المسلسل لحد دلوقتي جميل جدًا، ووصفوا الصورة إنها “نضيفة”.
ورحب الجمهور جدًا بالمسلسل، لإنه مختلف عن دراما الخيانة والنكد وغدر الصحاب، وإنه رايح في ناحية التاريخ والدراما الاستقصائية اللي افتقدناها في التلفزيون المصري مؤخرًا.
والبعض قال كلام كويس عن المسلسل، وأكد إن يعز عليه إنه يشكر في أي عمل فني لخالد يوسف، علشان الفضيحة الأخيرة اللي طالت المخرج.
ووصل ببعض الناس إنهم يحذروا الناس من الفرجة على المسلسل، بسبب اللي حصل من خالد يوسف في حق البنتين.
ومسلسل سره الباتع، بيحكي قصة السلطان محمود اللي وقف ضد الغزو الفرنسي أيام المماليك في مصر، وهو من تأليف يوسف إدريس، وعن رواية (سره الباتع)، ومن إخراج خالد يوسف، وبطولة أحمد فهمي ومجموعة من النجوم.
بعد كل الكلام الكويس عن مسلسل سره الباتع، هتتفرج عليه ولا عندك تحفظات؟