بعد الكورونا والحبسة اللي اتحبسناها، وكل حاجة بقت أونلاين من خلال التطبيقات، من المدارس والجامعات للشغل لأعياد الميلاد للحفلات وحتى التمارين الرياضية بقت أونلاين، ودي حاجات شوفناها كتيرة الفترة اللي فاتت، ولكن الجديد اللي حصل إن الفنانة رزان جمال حضرت مهرجان القاهرة أونلاين.
أيوة بالظبط زيّ ما قريته، حضرت مهرجان القاهرة من خلال تطبيق على الموبايل أونلاين بسبب جدولها المشغول في تصوير أعمالها. وشوفنا رزان جمال مؤخرًا في المسلسل الجميل “ما وراء الطبيعة”، اللي أبهرنا بأحداثه، وأبهرتنا هي كمان بدورها.
ومفيش شك إن انتشار وباء كورونا أثر على حياتنا كلنا وشكلها، وكل حاجة سواء شغلنا أو حياتنا الطبيعية زيّ الخروجات والتسوق وكل حاجة تقريبًا اتغيرت وبقت أونلاين، يعني مثلًا كل الناس بقت تشتغل من البيت واجتماعات الشغل بقت على تطبيق “زوم”، وكمان مع اختفاء خروجات السينما فاضطر صناع الأفلام إنهم ينزلوا أعمالهم أونلاين على منصات المشاهدة الإلكترونية زيّ “نتفليكس”، و”شاهد”، وكمان اختلفت طريقتنا في التسوق ومبقناش لازم ننزل نشتري الهدوم أو الاكسسوارات أو أي حاجة محتاجينها وبقينا بنجيب كل حاجة فعلًا أونلاين وإحنا قاعدين في البيت.
هي أكيد حاجة مريحة لينا إن حاجات كتيرة تبقى أونلاين، بس اللي عايزين نعرفه هو فعلًا بعد ما الوباء يختفي هنرجع تاني زيّ الأول ولا خلاص الأونلاين هتقضي على الحاجات اللي كنا بنعملها قبل كورونا؟