الإعلانات في رمضان شيء أساسي، زيّها زيّ المسلسلات بظبط، كل الناس بتابعها وبتحللها وبتبقى هي الحدوتة، أي إعلان بيبقى عامل زيّ قاعدة العرب بين الماركتير وصاحب المنتج؛ لو عندك غسالة حابب تبيعها الماركتير هيقولك إيه أحسن طريقة تبيعها بها تجيب مع الناس، هنجبلك أبرز نجوم وهنعملك أغنية وهنفرحك وهندلع الغسالة، وهنجيب أعلى مبيعات، وعلى رأي حسن حسني في فيلم “جعلتني مجرمًا”، “هي الغسالات مابتباعش ليه.. هي الناس بطلت تنضف”؟
وبعد شوية دعبسة وبحث حلوين، وبعد ما سألنا ناس دايسة في المجال وعارفة مين بيودي على فين، قررنا نجيب لكم الخلاصة اللي لازم تعملها وتمشي عليها علشان إعلانك يبقى هو التريند.
لازم يبقى في ممثلين.. كتير.. كتير
لازم كل شركة تجيب على الأقل نجمين أو تلاتة في الإعلان الواحد، شوفنا وسألنا ودعبسنا واتطقسنا من المخرج محمد الزيات، وقال إن “وجود ممثلين ونجوم هيخلي الإعلان يتشاف أكتر ويبقى تريند أسرع. والكلاينت بيبقى عايز كده، وإن الناس بتستنى تشوف الممثلين هيعملوا إعلانات إيه مش مسلسلات إيه.”
هو عمرو دياب كان عامل إعلان عن إيه أصلًا؟
لازم يبقى في أغنية وكورال واستعراض
بجانب الممثلين اللي لازم يبقوا موجودين، لازم نعمل أغنية كلامها لذيذ وخفيف ويعلق مع الناس ويمشوا يرددوها، فاكرين أغنية يا “إما فريش يا إما بلاش”؟ ولا زيّ “جاري يا جاري يا حتة سكرة”، ولا زيّ جملة “باظظ باظظ خالص” اللي علقت مع الناس واتعمل منها أكتر من إعلان بنفس التيمة لإنها هي دي اللي جابت مع الناس، ولا زيّ “راح فين زمن الشقاوة ده يا حسين؟” محتاجين كل سنة أغنية زيّ دول نمشي نرددهم طول الشهر.
هما كانوا بيبيعوا إيه أصلًا؟
لو مابتعرفش تغني هنخليك تغني
الإعلانات السنة دي طلعت مواهب كانت مدفونة عند الممثلين ماكوناش نعرفها، اكتشفنا موهبة نيللي كريم ومنى زكي ودينا الشربيني. طالعناهم من دايرة الراحة بتاعتهم وخليناهم يلبسوا فساتين وألوان كتير، عايزين بهجة أوفر مش كتير بس. خلي الناس تفرح. ممكن نعمل رقصة استعراضية هنا، نطة هنا ونطة هناك، بعد اللي شفناه في مسلسلات السنين اللي فاتت، وأخيرًا شوفنا نيللي كريم وهي بتضحك.
هما جابوا الفساتين دي منين؟
عمرو دياب ويسرا وعسيلي أساسي كل سنة
عمرو دياب مايختلفش عليه اتنين، لازم كل سنة يطلع أصغر من اللي قبلها، وعسيلي اللي كنا قلقانين عليه إنه ماعملش إعلان بنك مصر السنة دي، بس الحمدلله طلع لنا في شكل جديد مع إعلان فريش وفرافيش.
هما فتحوا جيم في القلعة يا جدعان؟
لازم لوكيشن مختلف .. سفرني سفر
لازم نجدد ونطور من نفسنا، وماله لما نسافر باريس ونشوف الدنيا؟ زيّ ما شوفنا في إعلان أحمد عز لما جابوا شارع أمريكاني و جو الـcow boy كان مسيطر على الإعلان، وإعلان يونيون إير جبنا كروما وحطينا وراها كل الحتت اللي عايزين نروحها، سافرنا الفضاء وروحنا الصحراء. ليه نفضل محصورين في مدينة الإنتاج الإعلامي؟
هي تذكرة الطيران بتاعت باريس بقيت بكام؟