“ده أنا هتاقلك بالدهب” جملة اتعودنا نسمعها كتير وبتعدي علينا مرور الكرام، وبتتقال في الغالب لما العريس يحب يتفشخر قدام أهل عروسته، بس شوفناها على الحقيقة صوت وصورة في فرح تاجر باكستاني في دبي.
على طريقة الأفلام الهندية، فاجئ عريس عروسته في فرحهم بوزنها بالدهب، جاب ميزان في حفل الزفاف وقعدت العروسة على كفة مطرزة بالدهب علشان يوزنها على الكفة التانية بسبايك من الدهب، ويدفع مهرها بناءً على الرقم اللي هيطلع، وبما إن وزنها طلع 69 كيلو جرام، فمبارك عليكي يا عروسة 69 كيلو دهب.
الناس على السوشيال ميديا انقسمت لجزئين، جزء ماصدقش حقيقة الفيديو وقال إن ده مجرد استعراض على طريقة الأفلام الهندية، وإنها ممكن تكون سبائك حديد مطلية بالدهب، وإن استحالة الدهب ده يبقى حقيقي، لإن ظاهر إن وزنه خفيف أوي في الفيديو، وفي ناس تانية صدقت عادي وشجعت الفكرة وانبهرت، وفي ناس تانية من عالم تاني قعدت تحسب تكلفة الدهب ويساوي قد إيه وقدروا في الآخر إن مهر العروسة 4 مليون دولار.. يا بلاش، بس حقيقة الفيديو لسه مانعرفش حاجة عنها.