فجأة لقينا خناقة كبيرة على وسائل التواصل الاجتماعي بين رضا البحراوي وحسن شاكوش. صدام كان بيتفاقم بسرعة كبيرة، كان بدايته على المسرح في الساحل الشمالي. كان في حفلة بتقام هناك ولما جيه حسن شاكوش علشان يبدأ لقى إن فرقة رضا لسه متواجدة على المسرح، وده اللي خلاه يقرر إنه مش هيكمل فقرته إلا لما فرقة رضا تمشي من المسرح وده اللي فعلًا حصل ولكن باستياء شديد من أعضاء الفرقة. وقبل ما ينتهي حسن شاكوش من فقرته، طلعت من تاني فرقة رضا على المسرح ومن هنا بدأ الصدام فتبادل الطرفين كلام حاد واضطر حمو بيكا للتدخل علشان يهدي الأوضاع، إلا إن الموضوع مانتهاش على كده بل تفاقم.
فلما ظهر رضا البحراوي على المسرح قال “فين حسن هو هرب” وده اللي اعتبره شاكوش إهانة فكان رد فعله عنيف واستخدم حفلته المُقامة في شرم الشيخ للرد عليه، وبدأ يقول إفيهات من فيلم حين ميسرة بتحمل فيها اسم رضا، وخلى الجمهور يردد وراه الإفيه وكلام تاني اعتبره الناس إنه خارج. وماكتفاش بده بس لكن كمان نشر شاكوش فيديو على صفحته بالفيسبوك استكمل فيها هجومه على رضا البحراوي وقلل فيها من قيمته الفنية وقال إنه ماعندوش cv ولا يقدر يحقق نجاحات زيّه.
وعلشان كده بعدها رد عليه رضا البحراوي من خلال فيديو على صفحته في الفيسبوك برضه اتهمه فيها إنه بيغلط فيه وفي أهله كمان بسبب الكلام اللي قاله، ودافع عن فنه قائلًا إنه بيقدر يغني live بعكس شاكوش اللي قال إنه بيغني بفلاشة ومجرد بيحرك شفايفه، وإنه مايقدرش يغني حفلات حية ولا يقدم تترات مسلسلات. واستمر الصدام ده لحد ما تدخلت نقابة المهن الموسيقية.
فقرر مجلس نقابة المهن الموسيقية، برئاسة هاني شاكر، وقف تصاريح الغناء لمدة شهر، يبدأ من تاريخ صدور القرار لكل من حسن شاكوش ورضا البحراوي وعدم مزاولتهم الغناء طوال مدة الوقف، بسبب اللي بدر منهم من تنمر وتبادل كلمات أمام الجمهور. فقالت النقابة “ما حدث يحط من قيمة الفن المصري الذي ظل طوال عقود طويلة هادياً للقيم والأخلاق، ولم يكن أبدا داعماً لإهدار الأخلاق والفضيلة، وتأتي مثل هذه الممارسات من البعض الذين لا يستشعرون قيمة فضل الله عليهم في مقابلة جمهور له كافة الحقوق في تلقي ما يسمو بهم لا ما يحط من قدرهم”.
بعد القرار ده اتفاجئنا بـ update وتطور جديد في الموضوع ولكنه كان إيجابي المرة دي. فنشر رضا البحراوي فيديو مع حسن شاكوش، قدموا من خلاله اعتذار للجمهور ونقابة المهن الموسيقية. وقال شاكوش إنهم بيتأسفوا لجمهور مصر كله ولنقابة المهن الموسيقية، مؤكدًا إن لو في أي لفظ خرج منه أو من رضا فكان من غير وعي، وإنهم هيتصالحوا في النقابة. أما البحراوي أضاف “أستاذ هاني شاكر أنت قدوتنا وده سوء تفاهم”. وفي فيديو تاني اعتذر البحراوي لأهالي بولاق الدكرور وبادله شاكوش الاعتذار لأهالي البحيرة عما بدر منهم من مشاحنات وتصريحات تمس جمهورهم.