بواسطة فرح أشرف.
كلنا زهقنا من قعدة البيت، كلنا اتحبسنا فوق الثلاث شهور في بيتنا حتى لو متحبسناش في بيتنا فكلنا نسينا الخروج والفسح والسفر والسهر الفترة دي، عشان كده أول لما الحظر اتفك والسفر بقي مسموح، معظمنا خد قرار بالسفر حتي لو جوا مصر.
وبما إن معظمنا ناوي عالسفر في الصيف ده، دي شوية حاجات محتاجين نخلي بالنا منها عشان يكون السفر تجربة أمنة وسعيدة.
إتأكد من صيانة عربيتك
السلامة ثم السلامة ثم السلامة، إتأكد من صيانة عربيتك اللي هتسافر بيها أو العربية اللي هتكون معاك في العموم. لازم نتأكد من سلامة العربية لأن أمان العربية من امانّا الشخصي، خصوصًا لو هي وسيلة المواصلات الوحيدة وإحنا علي طريق سفر.
توضيب الشنط
كتير بنشوف ناس مسافرة وواخدة شنط سفر كتير وحاجات كتير أوي معاها ومش بتستعمل نصها بس بنشيل و ناخد حاجات كتير تزنقنا. عشان كده بننصحك تاخد حاجات ضرورية و ناخد حاجات قليلة فزيّ ما بيقولوا “pack lightly” .
الحيوانات الأليفة
لو عندك حيوان أليف وهتسافر بيه، حاول تهديه في الطريق و تشربه مياة كل شوية عشان ميحصلوش جفاف في الطريق ويتعب، وكمان طمنه عشان تعرف تستمتع بالطريق من غير إزعاج، و متنساش تاخد حاجته كلها بالذات الأكل لأن أكلهم مش بيبقي موجود علي طول متوفر.. مش عايزين حاجة تبوظ الإجازة!
الأساسيات
وإحنا بنوضب الشنط مننساش أهم حاجة من أساسيات السفر وخصوصًا لو السفر في الصيف زي دلوقتي، والأساسيات دي من أهمها واقي الشمس عشان نتأكد إن مفيش أيّ ضرر يحصل لوشنا أو جسمنا من أشعة الشمس، اللي ساعات كتير ممكن تؤدي لحروق لو اتعرضنا ليها لفترة طويلة من غير وقاية . ولو إنت من محبين التان مننساش ناخد الـ tanning oil طبعًا.
التباعد الاجتماعي
أيّ مكان هنسافر فيه الفترة دي هيكون فيه بحر وفي ظل ظروف الكورونا، البحر أو الشاطئ الزحمة مش من أفضل الحلول، يس أكيد كلنا هنروح، امال مسافرين ليه؟ فخلينا نحاول علي أد ما نقدر نحتفظ بمسافة بين الناس ونقلل الاختلاط ونبعد عن الاماكن الزحمة ونحافظ علي معاير السلامة لمنظمة الصحة العالمية بتحث علي اتباعها.