لو فتحت الفيسبوك، هتلاقي كتير جدًا من الكوميكس اللي بنشوفها بتبقى عن المرتب، سواء بقى إن المرتب قليل وإننا بنشحت في آخر الشهر، لو ماكنش من نصه، أو هزار من إن الأونلاين شوبينج خرب بيتنا، لخروجات صحابنا وسفريات دهب اللي بنتفق عليها وإحنا في جيبنا 7 جنيه ونص! المأساة دي فعلًا ممكن نلاقي كل الناس بتتفق عليها، بمختلف مستويات المرتب، معظم الناس بتلاقي نفسها مزنوقة في آخر الشهر. وبرغم إن أكيد مبلغ المرتب أكيد بيفرق، إلا إن العامل الرئيسي اللي بيخلي الكل يوصل للزنقة اللي بنكلم عنها، ليها دعوة أكتر بكيفية إدارتنا وصرفنا للفلوس.. وعشان كده دول 7 خطوات بسيطة هتساعدك تحافظ أكتر على مرتبك وتبقى منظم في عملية الصرف والتحويش… بس يا رب نعملهم ومانرجعش في كلامنا!
ماتدخلش السوبر ماركت وانت جعان
ممكن تستغرب إننا حطينا النقطة دي، وأول واحدة كمان.. بس ده علشان هي tricky جدًا! مجازفة كبيرة إنك تدخل السوبر ماركت تشتري حاجة وانت واقع من الجوع، ببساطة لإن هيبقى نفسك في أي حاجة في الدنيا، حتى الأكلات اللي انت مابتحبهاش أصلًا، فهتلاقي نفسك في الآخر دفعت ألف جنيه وانت أصلًا كنت رايح تشتري علبة لبان! فقبل ما تنزل تشتري حاجة، فكر كويس واتأكد إنك شبعان، علشان لما تروح تشتري الحاجات اللي انت فعلًا محتاجها بس.
قيّم الحاجة قبل ما تشتريها
إحنا عارفين إن شراء الحاجات التافه ليها متعة خاصة وطعم تاني، بس مش أي حاجة تشوفها جميلة، تروح رايح شاريها على طول ومخلص مرتبك عليها من غير ما تفكر.. اقف بس دقيقتين قدام الحاجة وفكر إذا كانت فعلًا مفيدة وهتفرق معاك ولا لأ، إحنا معاك إن سرير الليفة كيوت وكل حاجة، بس أكيد مش هينفعك وانت محتاس ومفلس آخر الشهر.
اخرج خروجات مش مكلفة “low-key”
إحنا مش هنقولك تتقشف وماتنزلش مع صحابك غير مرتين في الشهر.. علشان خلينا واقعيين، الكلام ده مش هيحصل، بس علشان نمسك العصاية من النص، ممكن تتفق مع صحابك إنكم تخرجوا خروجات بسيطة ماتتكلفش كتير، وحتى لو هتروح مكان غالي شوية ممكن تنزل من البيت متغدي وتطلب عصير أو مشروب بس في المكان وتوفر تمن الأكل.. طبعًا ده مش في كل خروجة بس حاول على قد ما تقدر تعمل ده.
إرحم نفسك من الشوبينج أونلاين
لو سمحت، لو سمحت.. وكمان مرة لو سمحت! مش كل ما يجيلنا إعلان أو نشوف حاجة أونلاين عاجبانا ندخل نكتب “h.m” عليها! الدنيا ساعات بتبقى ملل، والحاجات بتبقى مغرية إحنا قادرين نتفهم كل ده، ومفيش مانع إن الواحد يدلع نفسه بحاجة كده كل فترة، وإننا نجيب الجاكيت اللي غالبًا مش هنلبسه قدام حد علشان الشتا بيخلص.. بس بحدود!
جيب أكلك معاك في الجامعة أو الشغل
انت لو ركزت وحسبت انت بتدفع قد إيه كل يوم تمن الدليفري اللي بتطلبه في الشغل أو القهوة اللي بتجيبها من الكافيهات.. مش بس هتبطل تتصدم إن فلوسك بتخلص من نص الشهر، ده انت هتحمد ربنا إنك مابتدخلش السجن وتبقى من الغارمين والغارمات! لو عودت نفسك تحضر الساندوتش أو الفاكهة بتاعتك كل يوم الصبح، هيجيلك ذهول من كمية الفلوس اللي هتلاقي نفسك حوشتها من غير ما تاخد بالك.
احتفظ بالفواتير وراجع مصروفاتك
بعد ما تشتري أى حاجة، احتفظ بالـ receipt في محفظتك أو راجع الفواتير أونلاين، وشوف إيه الحاجات اللي انت اشتريتها وتمنهم كان قد إيه، ووسط عياطك على الفلوس اللي راحت منك، فكر كويس تاني وشوف لو كانت الحاجات دي فعلًا تستاهل.. ده هيساعدك إنك المرة اللي جاية ماتقعش في نفس الغلطة (hopefully)!
شيل جزء من المرتب على جنب أو مع حد
لو انت حاسس إنك فعلًا مش قادر تمسك نفسك ولا تتحكم في صرفك لمرتبك بشكل هستيري، يبقى الحل إنك كل شهر تشيل مبلغ معين على جنب أو مع حد، وتمنع نفسك تمامًا إنك تيجي ناحيته لحد الشهر اللي بعده.. وممكن كمان تنزل الخروجة بمبلغ صغير في المحفظة وتسيب بقية الفلوس في البيت، علشان تجبر نفسك إنك تلتزم بالمبلغ الصغير اللي معاك بس.