الكشري من الأكلات اللي بيحبها كتير من المصريين وبيعتبروها أكلة مصرية أصيلة تمنها رخيص ولذيذة ومغذية وبيحبها كل الطبقات، وفي الساعات القليلة اللي فاتت حصل جدل كبير بين قراء سكوب إمباير بعد ما نشرنا مقال عن الأكلات الشعبية المصرية اللي أصلها مش مصري، وكتير من القراء شافوا عدم مصرية الكشري تجاوز كبير وده اللي هنحققه في المقال ده.
الكشري كأشهر الأكلات شعبية
الكشري من أشهر الأكلات الشعبية المصرية اللي بيتكون من المكرونة والرز والعدس الأسود والبصل المقلي وصلصة الطماطم والتقلية، وبيعتبر الكشري أكلة منخفضة التكلفة، وعالية السعرات الحرارية، وعلى الرغم من كده من النادر إن تلاقي مصري مش بيحب الكشري.
ابن بطوطة وأول توثيق تاريخي للكشري
أول مؤرخ أتكلم عن الكشري في التاريخ هو ابن بطوطة اللي توفى سنة 1377م، وده في كتابه “تحفة النظار في غرائب الأمصار وعجائب الأسفار“، ووصف في رحلته للهند الكشري وقال “يطبخون الشعير مع الأرز ويأكلونه بالسمن ويسمونه كشري وعليه يفطرون في كل يوم”. الطبق الهندي اللي أتكلم عنه ابن بطوطة كان فيه رز وعدس بس، لكن الكشري المصري بيحتوي على مكونات زيادة زيّ الصلصة المصرية وغيرها من الإضافات.
الكشري والحرب والعالمية
مصادر غير موثقة على الإنترنت بتتكلم عن أصل أكلة الكشري وبترجع انتشارها في مصر للحرب العالمية الأولى وإنها انتشرت مع الجنود الهنود اللي كانوا مع القوات البريطانية مع فرض الحماية البريطانية على مصر سنة 1914، وكانوا مسمينها “كوتشري”، ومع اختلاط المصرىين بالجنود الهنود وعاداتهم، انتقلت أكلة الكشري للمطبخ المصري.
رحالة أيرلندي وسر الكشري
في كتابه “رحلة بيرتون إلى مصر والحجاز” حكى الرحالة الأيرلندي، ريتشارد بيرتون، عن الكشري وقت زيارته للسويس سنة 1853، واللي وصف فطار أهل السويس في الصيف اللي بيحبوا يأكلوا فيه الفطير، أما في الشتاء فوجبة الفطار وصفها بالأكتر أهمية وقال إنها بتبقى من طبق اسمه الكشري اللي بيتكون من العدس والرز وسمن وبصل مقطع مسوى على نار هادية ليمون مخلل.
الكشري والفراعنة
الكشري ورد في كتاب الجبتانا أو أسفار التكوين المصرية، وهو كتاب فيه نصوص دينية خاصة بمصر القديمة، واتقال فيه إن أصل كلمة كشري هو “كشير” وهو طعام الآلهة عند الفراعنة.
خصوصية الكشري المصري
الدكتورة نهلة إمام، رئيس قسم العادات والمعتقدات والمعارف الشعبية، بتقول إن الأكلات بتنتقل لمختلف البلاد بسبب التبادل الثقافي بين الدول دي، وأضافت إن الكشري حتى ولو ظهر في الهند أو أي بلد تانية قبل مصر لكنه ما ظهرش بنفس المكونات، وبعدين حصله تطوير بإضافة الصلصة والدقة والشطة والبصل المحمر.