في فعاليات الدورة التامنة من مهرجان أفلام السعودية، اللي بيقام السنة دي من يوم 2 ليوم 9 يونيو، هيتم تكريم الفنان السعودي الراحل، خليل رواف، أول ممثل عربي في هوليود. التكريم ده بعد 22 سنة من وفاته، وعلشان كده، حبينا نفتكر مسيرة الفنان وحياته، وازاي قدر يبقى أول ممثل عربي في هوليود، ورحلته هناك.
الرواف في هوليود
خليل إبراهيم الرواف هو صاحب أول حضور عربي في أفلام هوليود، بالدور اللي قدمه في فيلم “كنت مراسلًا حربيًا” اللي أتعرض سنة 1939، لكن فريق العمل ابتدى يشتغل في الفيلم ده من 1937، والدور اللي قام بيه خليل كان دور حارس لشيخ قبيلة عربية موجودة في العراق خلال أحداث الفيلم، اللي وقتها حقق نجاح وأتشاف عالميًا، والصحف الأمريكية وقتها أتكلمت عن الظهور الأول لشخص عربي في أفلام أمريكية.
حياته الشخصية
عن حياته، الرواف أتولد في مدينة بريدة في القصيم، سنة 1895م، بدأ حياته بشغل بسيط كبائع جِمال، بياخد الجمال من المملكة العربية السعودية علشان يبيعها في دول شبه الجزيرة العربية. كان بيتنقل في قوافل تجارية علشان يدور على رزقه، في العراق وسوريا وفلسطين، وأتعرف في فترة وجوده في العراق على الأمريكية، فرانسيس أليسون، اللي أتجوزها بعدين، وسافر أمريكا علشان تبتدي حياته تتغير كلها.
لكن جوازهم ماستمرش فترة طويلة وانفصلوا، وبعدها تفرغ الرواف لتأليف كتب لتعليم اللغة العربية، وفتح مدرسة لتعليم اللغة العربية كمان، وأتجوز بعدها كونستانس وليمان، اللي خلف منها طفل سماه نواف، لكن برضه ماستمرش جوازهم كتير وانفصلوا، وأتجوز بعدها من ست مصرية وخلّف منها طفلين.
ناس كتير كانت فاكرة إن أول ممثل عربي يدخل عالم هوليود هو عمر الشريف بس المعلومة دي مش صح، لإن خليل الرواف هو أول ممثل عربي في هوليود من 1939، عمر الشريف بدايته في هوليود كانت في 1962 في فيلم “لورانس العرب”، وممكن المعلومة دي تعتبر صدمة فنية للجمهور.